რუსეთის საგარეო საქმეთა მინისტრმა სერგეი ლავროვმა ოკუპირებული სამხრეთ ოსეთის ე.წ. საგარეო საქმეთა მინისტრთან ახსარ ჯიოევთან შეხვედრაზე განაცხადა, რომ „2008 წლის გადაწყვეტილებები გადახედვას არ ექვემდებარება“.

მისი თქმით, მოსკოვი გააგრძელებს “მეგობრების დახმარებას უსაფრთხოების უზრუნველსაყოფად, სოციალურ - ეკონომიკური სფეროსა და სხვა სფეროების განვითარებაში, სახელმწიფოს გამტკიცებაში, როგორც ეს ორმხრივი შეთანხმებებითაა გათვალისწინებული“.

ლავროვი შეეხო უსაფრთხოებისა და სტაბილურობის შესახებ დისკუსიების ჟენევიდან სხვა ქალაქში გადატანის თემასაც. მისი თქმით, ისინი მჭიდროდ მუშაობენ სოხუმთან „ამიერკავკასიაზე კონსულტაციების” ფარგლებში, რომელიც ბოლო დრომდე ტარდებოდა ჟენევაში.

“ახლა შევხედავთ, სად არის უფრო მოსახერხებელი ამ ტიპის შეხვედრის ორგანიზება“, - თქვა მან რუსეთის საგარეო უწყებაში გამართულ ბრიფინგზე.

ამავე ინფორმაციით, დღესვე ლავროვი მოლაპარაკებებს გამართავს აფხაზეთის დე ფაქტო რესპუბლიკის ე.წ. საგარეო საქმეთა მინისტრთან სერგეი შამბასთან.

ინფორმაციისთვის, რუსეთის საგარეო საქმეთა მინისტრმა სერგეი ლავროვმა განაცხადა, რომ მოსკოვი მზად არის დაეხმაროს საქართველოს „აფხაზეთთან და სამხრეთ ოსეთთან ურთიერთობის ნორმალიზების“ პროცესში, თუკი „ქვეყნები“ დაინტერესდებიან ამით.

ქართული ოცნების“ გენერალური მდივანმა და თბილისის მერმა კახა კალაძემ 29 სექტემბერს განაცხადა, რომ ხელისუფლება პოზიტიურად აფასებს რუსეთის საგარეო საქმეთა მინისტრის სერგეი ლავროვის განცხადებას.

კალაძის განცხადებას სოხუმში უპასუხეს და თბილისს მოსკოვთან ურთიერთობების დალაგებისკენ მოუწოდებენ.

რუსეთი არ გაიყვანს ჯარებს ოკუპირებული აფხაზეთიდან და სამხრეთ ოსეთიდან და არ განიხილავს საქართველოსთვის მათ დაბრუნებას. ამის შესახებ რუსეთის სახელმწიფო დუმის დსთ-ს, ევრაზიული ინტეგრაციისა და თანამემამულეებთან ურთიერთობის კომიტეტის თავმჯდომარის პირველმა მოადგილემ კონსტანტინ ზატულინმა განაცხადა, რითაც ლავროვის განცხადებას გამოეხმურა.

საქართველოს აფხაზეთისა და ცხინვალის რეგიონები რუსეთმა 2008 წლის აგვისტოს ომის შემდეგ დამოუკიდებელ ქვეყნებად აღიარა, იმავე წლის სექტემბერში ნიკარაგუამ ცნო აფხაზეთის დამოუკიდებლობა, 2009 კი ვენესუელამ და ნაურუმ, ხოლო 2018 წელს - სირიამ.