თბილისში, არჩევნების შედეგების გასაპროტესტებლად დღეს დაგეგმილ აქციას მოქალაქეები სხვადასხვა რეგიონიდან, მათ შორის ზუგდიდიდან შეუერთდებიან.

აქტივისტებისა და სამოქალაქო საზოგადოების წარმომადგენლების თქმით, ზუგდიდში ამ დროისთვის, სპონტანურად, 50 ადამიანის მობილიზება მოხერხდა, რომლებიც უკვე გაემართნენ დედაქალაქისკენ.

ისინი აღნიშნავენ, რომ არჩევნები სერიოზული დარღვევებით წარიმართა, რამაც მნიშვნელოვანი ზეგავლენა იქონია ამომრჩევლის თავისუფალ ნებაზე, რაც, მათი თქმით, საზოგადოების მიერ პროტესტის გამოხატვის საფუძველია.

"ეს არჩევნები არ ასახავს ქართველი ხალხის ნებას. ის არის გაყალბებული, რაც აჩენს საზოგადოებაში პროტესტის გრძნობას. ამისთვის მივდივართ თბილისში აქციაზე. ყველა საერთაშორისო სადამკვირვებლო ორგანიზაციებმა დაადასტურეს, რომ იყო ძალადობის ფაქტები, პირადობების ჩამორთმევები და სხვა ისეთი შემთხვევები, რომელმაც გავლენა მოახდინა არჩევნების შედეგებზე", - ამბობს სამოქალაქო აქტივისტი დათა აქუბარდია.

დღეს, თბილისში, რუსთაველის გამზირზე საპროტესტო აქცია 19:00 საათზე გაიმართება. ის საქართველოს პრეზიდენტმა სალომე ზურაბიშვილმა 27 ოქტომბერს, ოპოზიციურ პარტიებთან შეხვედრის შემდეგ გამართულ ბრიფინგზე დააანონსა. პრეზიდენტი არ აღიარებს არჩევნების შედეგებს და მან მოსახლეობას ერთად დგომისკენ მოუწოდა.

ცნობისთვის, საქართველოს ცენტრალურმა საარჩევნო კომისიამ საარჩევნო უბნების თითქმის 100 პროცენტი უკვე დათვალა.

ხმები შემდეგნაირად გადანაწილდა :

"ქართული ოცნება" - 53,93% - 1 119 967 ხმა
"კოალიცია ცვლილებისთვის" - 11,035% - 229 163 ხმა
"ერთიანობა - ნაციონალური მოძრაობა" - 10,161% - 211 130 ხმა
"ძლიერი საქართველო" - 8,814% - 182 955 ხმა
"გახარია საქართველოსთვის" - 7,76% - 161 327 ხმა

ოპოზიციური პარტიები, რომლებმაც საკანონმდებლო ორგანოში მოსახვედრად გადალახეს 5%-იანი ბარიერი, აცხადებენ, რომ ისინი არ ცნობენ არჩევნების შედეგების ლეგიტიმაციას.

შეგახსენებთ, ცესკოს წინასწარი მონაცემებით, 26 ოქტომბრის საპარლამენტო არჩევნებზე აქტივობამ 58,94% შეადგინა, რაც იმას ნიშნავს, რომ არჩევნებზე 2 060 412 მოქალაქე გამოცხადდა. წელს არჩევნები სრულად პროპორციული სისტემით ჩატარდა.