ზუგდიდის 67-ე საოლქო საარჩევნო კომისიაში განხილული 7 საჩივრიდან ყველა მათგანი უსაფუძვლოდ მიიჩნიეს. ამის შესახებ რადიო "ათინათს" ზუგდიდის საოლქო საარჩევნო კომისიის თავმჯდომარემ მირანდა მესხმა უთხრა.

მისი თქმით, საჩივრების რაოდენობა, ფაქტობრივად, ხუთი იყო, რადგან სამ არასამთავრობო ორგანიზაციას ერთობლივად ჰქონდა ერთი საჩივარი წარმოდგენილი, რომელიც ცალ-ცალკე იყო რეგისტრირებული.

"ორი საჩივარი "ლელოსა" და "ენმ"-ს მხრიდან იყო. დაყენებული მოთხოვნა იყო 67-ე ოლქის 70-ვე უბანზე კენჭისყრის შედეგების ბათილობა, რაც არ დაკმაყოფილდა უსაფუძვლობის გამო. რაც შეეხება დამკვირვებელ ორგანიზაციებს, საიას ჰქონდა ზოგადი შინაარსის ერთი საჩივარი და მეორე - კონკრეტულად ხუთ უბანზე ითხოვდა გადათვლას. სკანირებული ვერსიაში ასახული მონაცემები არ ემთხვევა შემაჯამებელი ოქმის მონაცემებს. სხდომაზე განიმარტა თუ რამ გამოიწვია ეს. პირველადი მონაცემის ატვირთვის შემდეგ, ხელით ხდება გადათვლა და სწორედ ხელით გადათვლაა უპირატესი. გადასატანი ყუთის ამომრჩევლების ბიულეტენების დასკანერება ხდება ხმის დათვლის აპარატში. ერთ-ერთი უბნის გადასატან ყუთში ბიულეტენი სველი იყო და აპარატში ვერ დაფიქსირდა, შესაბამისად, ის, როგორც ნამდვილი ხმა დაიდო და დაემატა ყუთიდან ამოსულ ბიულეტენებს.არც აღნიშნული საჩივარი არ დაკმაყოფილდა ", - თქვა მან.

მესხმა ასევე დაადასტურა "ერთიანობა - ნაციონალური მოძრაობის" დამკვირვებლის სხდომიდან გაძევების ფაქტი. მისი თქმით, ის ხელს უშლიდა და ამცირებდა კომისიის წევრებს, რის შემდეგაც რამდენჯერმე გააფრთხილეს და საბოლოოდ, კომისიური გადაწყვეტილებით, გააძევეს სხდომიდან.

67-ე საოლქო საარჩევნო კომისიაში წარდგენილია ადმინისტრაციული საჩივრებიც, რომლებიც მე-9 და მე-12 უბანზე დამკვირვებლების გაძევებას ეხება.