აფხაზეთის თვითგამოცხადებული რესპუბლიკის ე.წ. გენერალურმა პროკურორმა, ადგურ აგრბამ, უხეშად უპასუხა ბელარუსის საგამოძიებო ცენტრის მოთხოვნას, რომელმაც მანამდე გამოაქვეყნა საგამოძიებო მასალები აფხაზეთში ალექსანდრე ლუკაშენკოს ინტერესების შესახებ და შეეცადა აფხაზურ „საგამოძიებო უწყებასთან“ დეტალების გარკვევას, წერს „ეხო კავკაზა“.

”ალექსანდრ გრიგორიევიჩი სამართლიანად მიიჩნევა ჩვენი დროის ერთ-ერთ ყველაზე ავტორიტეტულ სახელმწიფო მოღვაწედ, ის მაგალითია პასუხისმგებლობიანი ლიდერის, რომელიც მტკიცედ იცავს თავისი ხალხის ინტერესებს, რომელსაც პატივს სცემენ ჩვენს ქვეყანაში”, - განუცხადა „გენერალურმა პროკურატურამ“ ბელარუსის საგამოძიებო ცენტრს და დასძინა, რომ ”აფხაზეთის რესპუბლიკის სამთავრობო უწყებებისადმი მსგავსი პროვოკაციული მიმართვების განმეორების შემთხვევაში, მათ ავტორებს დაუყოვნებლივ გაუყენებენ სამი ასოსგან შემდგარ ცნობილ მარშრუტს“.

13 ოქტომბერს ბელარუსის საგამოძიებო ცენტრმა გამოაქვეყნა საგამოძიებო მასალა, რომლის მიხედვითაც, 2022 წლის 28 სექტემბერს ლუკაშენკოს ოკუპირებულ აფხაზეთში ვიზიტის შემდეგ, მის მიერ კონტროლირებად კომპანიას, 20 ჰექტარზე განთავსებული მიწის ნაკვეთი გადაეცა, „დიდი საინვესტიციო პროექტის განსახორციელებლად“, კერძოდ კი ოჩამჩირის რაიონის სოფელ კინდღში, შავი ზღვის სანაპიროზე, სანატორიუმის და საკურორტო კომპლექსის მშენებლობისთვის.

„ამავდროულად, მიწის ნაკვეთის ღირებულებამ შესაძლოა, მილიონობით დოლარი შეადგინოს. სოფელ კინდღის რაიონში ფასი იცვლება ზღვასთან სიახლოვის მიხედვით. მაგალითად, წყლიდან ას მეტრში 1 ჰექტარი მიწა 31 მილიონ რუსულ რუბლად (დაახლოებით 320 ათას დოლარად) იყიდება. ამ ხარჯიდან გამომდინარე, შეიძლება ვივარაუდოთ, რომ 20 ჰექტარზე ფართობი, დაახლოებით, 6,4 მილიონი დოლარი დაჯდება. "ჟემჩუჟინა 2010"- ის მიწის ნაკვეთი, პირდაპირ შავი ზღვის სანაპიროზე მდებარეობს და სავარაუდოდ, მისი ფასი კიდევ უფრო მაღალია", - წერენ გამომძიებლები.

ბელარუსის ავტორიტარ ლიდერს, ალექსანდრე ლუკაშენკოს აფხაზეთის დამოუკიდებლობა არ უღიარებია, თუმცა, 2022 წლის 28 სექტემბერს ის ოკუპირებულ აფხაზეთში ჩავიდა და ასლან ბჟანიას ბიჭვინთაში შეხვდა.

2023 წლის ოქტომბერში კი აფხაზური დელეგაცია გაემგზავრა მინსკში, "ორმხრივი უწყებათაშორისი კონსულტაციების ჩასატარებლად".