სამხრეთ კავკასიაში უსაფრთხოებისა და სტაბილურობის საერთაშორისო დისკუსიებზე რუსეთის დელეგაციამ საქართველოს მიერ ე.წ აფხაზეთისა და სამხ. ოსეთის ავტონომიური რესპუბლიკების მიმართ ძალის გამოუყენებლობის იურიდიულად სავალდებულო გარანტიების აღებაზე ისაუბრა. ამის შესახებ ინფორმაცია რუსეთის საგარეო საქმეთა სამინისტრომ გამოაქვეყნა. 

მათი თქმით, ეს პროცესი ქართულ-აფხაზური და ქართულ-ოსური სახელმწიფო საზღვრების დელიმიტაციით უნდა დაიწყოს და გაგრძელდეს შემდგომი დემარკაციით.

"აღნიშნული ამოცანების აქტუალურობა განპირობებულია ოფიციალური თბილისის მიერ თვით საქართველოში და მის ფარგლებს გარეთ იმ პოლიტიკური ძალების არსებობით, რომლებიც გეგმავენ რუსეთის წინააღმდეგ "მეორე ფრონტის" გახსნას აფხაზეთსა და სამხრეთ ოსეთში, ასევე ქვეყნის ნატოსა და ევროკავშირში გაწევრიანების შესახებ საქართველოს კონსტიტუციაში არსებული დოქტრინული დებულებების რეგულარული დადასტურებით, ეროვნული შეიარაღებული ძალების ჩრდილოატლანტიკური ალიანსის სტანდარტების შესაბამისად მშენებლობის გაგრძელებით", - აღნიშნა რუსულმა მხარემ.

საგარეო უწყვების ცნობით, ჰუმანიტარულ მიმართულების ერთ-ერთი პრობლემა თბილისის მიერ გაეროში ყოველწლიურად შეტანილი უკიდურესად პოლიტიზებული რეზოლუციაა, რომელიც იძულებით გადაადგილებულ პირებსა და ლტოლვილებს ეხება. "სოხუმისა და ცხინვალის წარმომადგენლებისთვის ნიუ-იორკში საკუთარი პოზიციების წარდგენაზე უარის თქმა კი კვლავ ხელს უშლის ამ საკითხის განხილვას GID-ის ეგიდით", - წერია განცხადებაში. 

შეხვედრაზე აფხაზურმა მხარემ ასევე მოითხოვა, ე.წ. საგარეო პასპორტებით უცხოეთში მიმოსვლის საშუალება მიეცეთ.

სამინისტროს განმარტებით, შვეიცარიის მიერ თავისი ნეიტრალური სტატუსის ფაქტობრივი დაკარგვის გათვალისწინებით, ასევე ანტირუსულ სანქციებთან მიერთების შედეგად, რუსეთის, აფხაზეთისა და სამხრეთ ოსეთის დელეგაციებმა კვლავ წამოაყენეს საკითხი რეგულარული რაუნდების ჟენევიდან სხვა, ყველა მონაწილისთვის მისაღებ ადგილას გადატანის შესახებ. 

ცნობისთვის, ჟენევის საერთაშორისო დისკუსიების 62-ე რაუნდი 5-6 ნოემბერს გაიმართა.