ქუთაისის სააპელაციო სასამართლომ არსამთავრობო ორგანიზაციების  “საერთაშორისო გამჭვირვალობა - საქართველოს”  და ,,ჩემი ხმის'' წარმომადგენლების სააპელაციო საჩივრები, რომლებიც ზუგდიდის, სენაკისა, ფოთის, ბათუმისა და ქუთაისის ცალკეულ უბნებზე 26 ოქტომბრის არჩევნების ხმის ფარულობის დარღვევას ეხებოდა არ დააკმაყოფილა.

,,ვასაჩივრდებდით ქუთაისის, ბათუმის, ქობულეთის, ზუდიდის, ფოთის და სენაკის საქალაქო და რაიონული სასამართლოების გადაწყვეტილებებს, რომლებითაც უარი გვეთქვა დასავლეთ საქართველოს 66 საარჩევნო უბნის კენჭისყრის შედეგების ბათილად ცნობასა და შესაბამისი საუბნო საარჩევნო კომისიების წევრებზე დისციპლინური/ადმინისტრაციული პასუხისმგებლობის დაკისრებაზე'', - წერს „საერთაშორისო გამჭვირვალობა - საქართველო“ .

როგორც TI - ის მიერ გავრცელებულ ინფორმაციაშია აღნიშნული, მოთხოვნების საფუძვლებად მითითებული იყო ხმის ფარულობის დარღვევა, დამკვირვებლებისათვის დაკვირვების პროცესში ხელშეშლა, მათ შორის, მათი საჩივრების რეგისტრაციაზე უარი, ამომრჩეველზე ერთზე მეტი ბიულეტენის გაცემა, ხმის რამდენჯერმე მიცემა, მარკირების წესების დარღვევა, სხვის მაგივრად ხმის მიცემა სხვისი პირადობის მოწმობის ან პირადი ნომრის გამოყენებით, საარჩევნო უბნებზე არაუფლებამოსილი პირების ყოფნა და სხვა.

ორგანიზაციაში განმარტავენ, რომ სააპელაციო საჩივრები ორ წარმოებად გაერთიანდა და ორივე საქმეში მონაწილეობდა მოსამართლე შოთა სირაძე, რომელიც ხობის საკრებულოში “ქართული ოცნების” ყოფილი დეპუტატი და შსს-ს საპატრულო პოლიციის დეპარტამენტის დირექტორის, ვაჟა სირაძის მამაა.

TI-ის ცნობით, სასამართლომ არ დააკმაყოფილა მათი შუამდგომლობები მისი აცილების შესახებ.

ამავე თემაზე:

საარჩევნო დარღვევებთან დაკავშირებული საჩივრები ზუგდიდის, სენაკისა და ფოთის სასამართლოებმა არ დააკმაყოფილეს

ზუგდიდის 67-ე საოლქო საარჩევნო კომისიამ არცერთი საჩივარი არ დააკმაყოფილა