რუსეთთან საინვესტიციო ხელშეკრულების რატიფიცირების მოწინააღმდეგეთა შტაბი “Апсны Хабар”, აფხაზურ ტელეგრამ არხზე წერს, რომ დე ფაქტო ხელისუფლება მორიგ ხრიკს ამზადებს აღნიშნული კანონპროექტის დასამტკიცებლად, რისთვისაც ცდილობს ბიჭვინთის „სქემა“ აამოქმედოს.

„მიწასთან, გირაოსთან და ობიექტების მესამე პირებისთვის გადაცემასთან დაკავშირებული მუქარა რეალურ საფრთხეს უქმნის აფხაზეთის სუვერენიტეტს, ეს ფაქტიურად აფხაზური მიწების სამუდამოდ გასხვისების გზაა“, - ვკითხულობთ ინფორმაციაში.

“Апсны Хабар” - ის წარმომადგენლების განცხადებით, საინვესტიციო ხელშეკრულების რატიფიცირებამდე იგეგმება კონსტიტუციური კანონის მიღება „მრავალფუნქციური კომპლექსების შესახებ“.

„რაც ნიშნავს იმას, რომ ეს არც აპარტამენტებია და არც აპარტო-ოტელები. ამ მანიპულაციის მიზანია საინვესტიციო ხელშეკრულების ფორმალურად შენიღბვა, ამ შეთანხმებაში დარჩენილი ერთ-ერთი საფრთხის „მოცილების“ მცდელობით. თუმცა, აშკარაა, რომ თუ ხელისუფლება ნამდვილად აპირებს აფხაზური ბიზნესისა და სახელმწიფოს ინტერესების დაცვას, მხოლოდ მრავალფუნქციური კომპლექსების შესახებ კანონი საკმარისი არ არის. კიდევ ასი კანონი იქნება საჭირო, რათა როგორმე გააუმჯობესოს აფხაზეთის პოზიცია ამ შეთანხმებაში.

არსებობს მოკლე გზაც - არ მოხდეს ამ დამაზიანებელი შეთანხმების რატიფიცირება“, - აღნიშნავენ ისინი, ამავე შეტყობინებაში. 

ცნობისთვის, აფხაზეთის დე ფაქტო რესპუბლიკის პარლამენტი უახლოეს სესიაზე გეგმავს განიხილოს „რუსეთის იურიდიული პირების მიერ აფხაზეთის ტერიტორიაზე საინვესტიციო პროექტების განხორციელების შესახებ“ შეთანხმების რატიფიცირების საკითხი. 

ოქტომბრის ბოლოს სოხუმმა ხელი მოაწერა მოსკოვის მიერ მოთხოვნილ კიდევ ერთ შეთანხმებას, რომელიც რუსულ კომპანიებს აფხაზეთში საინვესტიციო პროექტების განხორციელების საშუალებას აძლევს. დოკუმენტის ძალაში შესვლის პროცედურა ითვალისწინებს ე.წ. პარლამენტში მის სავალდებულო რატიფიცირებას.

აფხაზური ოპოზიციის ნაწილი ამ დოკუმენტის წინააღმდეგ გამოდის და მიაჩნია, რომ ეს გამოიწვევს "ოლიგარქიის გაფართოებას".

ცნობისთვის, 1 სექტემბრიდან მოსკოვმა შეაჩერა ოკუპირებული აფხაზეთის ბიუჯეტის დაფინანსება, მათ შორის, საინვესტიციო ხელშეკრულების დამტკიცების მოთხოვნით.