აფხაზურ ე.წ. პარლამენტში დაიწყეს „საკონსტიტუციო კანონპროექტის განხილვა“, რომელიც ითვალისწინებს თვითგამოცხადებული რესპუბლიკის მინისტრთა კაბინეტის და პრემიერ-მინისტრის თანამდებობის გაუქმებას, წერს „აფსნიპრესი“.

ოკუპირებული აფხაზეთის ე.წ. პრემიერ-მინისტრის პოსტს ამჟამად ალექსანდრე ანქვაბი იკავებს.

 

ამავე ცნობით,  „კონსტიტუციაში“ შესატანი ცვლილებები, „პარლამენტის სახელმწიფო-სამართლებრივი პოლიტიკის კომიტეტის სხდომაზე“ განიხილეს. დოკუმენტი „საკონსტიტუციო რეფორმის კომისიის“ მიერ წარმოდგენილი წინადადებების საფუძველზე მომზადდა. 

აფხაზი ლიდერის ასლან ბჟანიას ე.წ. ადმინისტრაციის თანახმად, "კანონპროექტში" შესატანი ცვლილებების შესაბამისად , „პრეზიდენტს ენიჭება უფლებამოსილება დაითხოვოს პარლამენტი და დანიშნოს ახალი საპარლამენტო არჩევნები, თუ პარლამენტის მიერ მინისტრობის კანდიდატების წარდგენაზე სამჯერ უარის თქმის შემდეგ, მინისტრთა თანამდებობების მესამედზე მეტი რჩება ვაკანტური; კანონპროექტი განსაზღვრავს საპარლამენტო არჩევნების თარიღის დადგენის წესს; პრეზიდენტს ენიჭება ცენტრალური აღმასრულებელი ორგანოების სტრუქტურის დამტკიცების უფლებამოსილება; შემოთავაზებულია ვიცე-პრეზიდენტის უფლებამოსილება ცალკე კანონით განისაზღვროს.
კომიტეტის წევრებმა გადაწყვიტეს ეს საკითხი პარლამენტის სესიის მომდევნო სხდომაზე პირველი მოსმენით გაიტანონ დასამტკიცებლად“.

წინასწარი ინფორმაციით, სხდომა 15 ნოემბერს არის დაგეგმილი. იმავე დღეს ე.წ. პარლამენტი საინვესტიციო პროექტების განხორციელების შესახებ რუსულ - აფხაზური შეთანხმების რატიფიცირების საკითხის განხილვას გეგმავს, რასაც ოპოზიცია ეწინააღმდეგება.

ასლან ბჟანიამ 2020 წლის 9 ოქტომბერს ხელი მოაწერა განკარგულებას „საკონსტიტუციო რეფორმის კომისიის“ შექმნის შესახებ. მისი წევრების უმეტესობა პრემიერ-მინისტრის პოსტის გაუქმების მომხრე იყო.

ცნობისთვის, 11 ნოემბერს, აფხაზეთის დე ფაქტო რესპუბლიკის „პარლამენტის“ სხდომაზე მეორე მოსმენით დაამტკიცეს კანონპროექტი „მრავალფუნქციური კომპლექსების სამართლებრივი სტატუსის მოწესრიგების შესახებ“.

აფხაზური ოპოზიცია ეწინააღმდეგება აღნიშნულ კანონპროექტს და მიიჩნევს, რომ ის რუსეთთან საინვესტიციო შეთანხმების რატიფიცირების წინაპირობაა. 


ამავე თემაზე;


სოხუმში ე.წ. პარლამენტმა მიიღო კანონი „მრავალფუნქციური კომპლექსების შესახებ“

ეს ფაქტიურად აფხაზური მიწების სამუდამოდ გასხვისების გზაა, - აფხაზური ოპოზიცია რუსეთთან საინვესტიციო ხელშეკრულებაზე.

დაძაბულობა სოხუმში - ბჟანიამ "უშიშროების საბჭოს" საგანგებო სხდომა მოიწვია