იმ შემთხვევაში, თუ აფხაზეთის თვითგამოცხადებული რესპუბლიკის პრეზიდენტის, ასლან ბჟანიას გადადგომის მოთხოვნა არ დაკმაყოფილდება, ოპოზიციის საკოორდინაციო საბჭომ შესაძლოა დროებითი მთავრობა შექმნას.

ამის შესახებ ვეტერანთა ორგანიზაცია „არუაას“ ლიდერმა თემურ გულიამ განუცხადა რუსულ "ტასს". 

„თუ პრეზიდენტი საღამომდე არ გადადგება, ჩვენ, საკოორდინაციო საბჭოსგან შევქმნით დროებით მთავრობას, მოვიწვევთ ყველა საჯარო მოხელეს სამუშაოდ, უზრუნველვყოფთ მათთვის სამუშაო პირობებს და გავაკონტროლებთ საჯარო მმართველობის პროცესს“, - განაცხადა გულიამ.

ოპოზიცია გამოდის წინადადებით, „პრემიერის“ და „პრეზიდენტის“ მოვალეობის შემსრულებელის თანამდებობაზე, არჩევნებამდე, "ფინანსთა სამინისტროს" ხელმძღვანელი ვლადიმერ დელბას კანდიდატურა დაასახელონ.

მანამდე, ასლან ბჟანიამ განაცხადა, რომ მზადაა გადადგეს, თუ აქციის მონაწილეები მისი ადმინისტრაციის შენობას დატოვებენ.

უფრო ადრე, მან ვიდემიმართვა გაავრცელა, რომელშიც ამბობდა, რომ გადადგომას არ აპირებს.

მასშტაბური აქციები სოხუმში 15 ნოემბერს დაიწყო. დილიდან აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი.  თვადაპირველად, აქციის მონაწილეები, რუსეთთან საინვესტიციო ხელშეკრულების გაუქმებას ითხოვდნენ, უფრო გვიან კი მთავარი მოთხოვნა გააჟღერეს - „პრეზიდენტის უპირობო გადადგომა“.   მომიტინგეები ე.წ. პარლამენტის შენობაში შეიჭრნენ და "პრეზიდენტის" ადმინისტრაციის ღობე გაარღვიეს.