აფხაზეთის თვითგამოცხადებული რესპუბლიკის “პრეზიდენტი” ასლან ბჟანია თანამდებობიდან გადადგა. პოსტი დატოვა “პრემიერ-მინისტრმა” ალექსანდრე ანქვაბმაც.

„ქვეყანაში სტაბილურობისა და კონსტიტუციური წესრიგის შენარჩუნების მიზნით, აფხაზეთის რესპუბლიკის კონსტიტუციის 65-ე მუხლის შესაბამისად, ვტოვებ აფხაზეთის რესპუბლიკის პრეზიდენტის თანამდებობას“, - ნათქვამია დოკუმენტში, რომელიც ბჟანიამ ხელი მოაწერა, „ხელისუფლებასა და ოპოზიციას შორის“ გამართული მოლაპარაკებების შემდეგ.

მხარეთა მიერ ხელმოწერილი შეთანხმების თანახმად, როგორც კი ბჟანია გადადგომის შესახებ განცხადებას გაავრცელებს, პროტესტის მონაწილე მოქალაქეებმა, დღეს, 19 ნოემბერს, „სამთავრობო“ შენობების კომპლექსი უნდა დატოვონ.
სამშაბათს, აფხაზეთის „პარლამენტი“ „პრეზიდენტის“ გადადგომის შესახებ განცხადებას განიხილავს. „პრეზიდენტის“ მოვალეობას „ვიცე-პრეზიდენტი“ ბადრა გუნბა შეასრულებს. „პრემიერ-მინისტრის“ პოსტზე „პარლამენტის“ ყოფილი სპიკერი ვალერი ბაგანბა დაინიშნა.

„მოქმედი მინისტრები მოვალეობას რესპუბლიკის ახლადარჩეული პრეზიდენტის თანამდებობაზე მოსვლამდე შეასრულებენ“, - აღნიშნულია დოკუმენტში.

მანამდე ბჟანიამ განაცხადა, რომ „საპრეზიდენტო“ არჩევნებში მონაწილეობას გეგმავს.

„საპრეზიდენტო“ არჩევნები ოკუპირებულ აფხაზეთში 2025 წლის გაზაფხულზე უნდა გამართულიყო, ახლა "შესაძლოა" ის უფრო ადრეც ჩატარდეს.

მასშტაბური აქციები სოხუმში 15 ნოემბერს დაიწყო. დილიდან აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი. თვადაპირველად, აქციის მონაწილეები, რუსეთთან საინვესტიციო ხელშეკრულების გაუქმებას ითხოვდნენ, უფრო გვიან კი მთავარი მოთხოვნა გააჟღერეს - „პრეზიდენტის უპირობო გადადგომა“.