დვანში ვითარება ამ დრომდე უცვლელი რჩება. ადგილობრივი მოსახლეობა საკუთარი სახლების დემონტაჟს აგრძელებს და სოფლის დატოვებისთვის ემზადება.   მათ ალტერნატიული საცხოვრებელი ფართი არ გააჩნიათ. ვადა კი, რომელიც რუსმა ოკუპანტებმა ადგილობრივებს მოსავლის ასაღებად დაუდგინეს, გუშინ ამოიწურა. ოკუპირებული ტერიტორიების მიმდებარე სოფლებში არსებული ვითარებით უცხოური მედიაც დაინტერესდა. სოფელ დვანში შექმნილ სიტუაციას უცხოელი ჟურნალისტები ადგილზე გაეცნენ და მოსახლეობას პირადად გაესაუბრნენ. დვანში არსებულ ვითარებასთან დაკავშირებით ინფორმაციას ჟენევის დისკუსიების თანათავმჯდომარეებს რეინტეგრაციის სამინისტრო მიაწვდის. დღეს მინისტრის მოადგილე, ჟენევის დისკუსიების ქართული დელეგაციის წევრებთან ერთად, რეგიონში ჩავა და ვითარებას ადგილზე გაეცნობა. დელეგაციის წევრები ადგილობრივ მოსახლეობას შეხვდებიან და ისაუბრებენ მავთულხლართებთან დაკავშირებულ პრობლემებსა და მათი გადაჭრის გზებზე. ქეთევან ციხელაშვილის განცხადებით, დვანში ვითარება საკმაოდ მწვავეა. ქართული მხარე დვანში არსებულ მდგომარეობაზე ჟენევის დისკუსიების თანათავმჯდომარეებს რეაგირებას სთხოვს.