თბილისში, საპროტესტო აქციის დაშლისას ზუგდიდელი ალექსი თირქია დაშავდა. მისი ბიძა, იოსებ ჩანადირი ჟურნალისტებთან ამბობს, რომ 22 წლის ახალგაზრდას ე.წ გაზის კაფსულა წარბის არეში მოხვდა.

მისი თქმით, დაშავებულის მხედველობა არ არის დაზიანებული, მაგრამ ოპერაცია შეუჩერდა, რადგან შეშუპება აქვს.

"როგორ ექიმებისგან ვიცით, დაზიანება არის საშუალო სიმძიმის. მარტივ ენაზე რომ გითხრათ, ხელოვნურად დააძინეს. ბებიას დაურეკა. უთხრა, რომ ალყაში იყო, ვერ გადიოდა. მეგობარ გოგოსთან ერთად იყო და ბებიასთან საუბრის დროს, გოგონას მოხვდა ერთი კაფსულა ფეხში, მეორე კაფსულა კი ამას მოხვდა სახეში. ის მომიტინგეებმა გამოიყვანეს.

ალექსი არის ძალიან უწყინარი, ყველაზე საყვარელი ბავშვი, რომლის მშობლებიც არიან ემიგრაციაში. "აყვავებული" ქვეყნიდან არიან წასულები ლუკმა-პურის საშოვნელად", - თქვა მან.

ინგოროყვას კლინიკის ექიმების ინფორმაციით, 22 წლის ახალგაზრდა იმყოფება რეანიმაციულ განყოფილებაში. მისი მდგომარეობა ამ დროისთვის სტაბილურია და არის მედიკამენტოზური ძილის ქვეშ. თირქია საავადმყოფოში მიიღეს სკალპის ღია ჭრილობით, შუბლის ძვლის და თვალბუდის ზედა კიდის მოტეხილობით და შუბლის წილის კონტუზიური დაზიანებით.