ოკუპირებული აფხაზეთის საგარეო საქმეთა მინისტრმა სერგეი შამბამ რუსეთში მცხოვრები აფხაზი სტუდენტების რუსეთის ფედერაციის სამხედრო გაწვევის კომისარიატებში რეგისტრაციის მოთხოვნებზე ისაუბრა.

მისი თქმით, საუბარია „ორმაგი, აფხაზეთის და რუსეთის მოქალაქეობის“ მქონე სტუდენტებზე. მისივე თქმით, ამ საკითხის გადაწყვეტა ჭიანურდება, რადგან საჭიროა რუსეთის ფედერაციის პრეზიდენტის დამატებითი განკარგულება.

„ეხო კავაზას“ თანახმად, სერგეი შამბას შვილიშვილსაც მოსთხოვეს სამხედრო კომისარიატში რეგისტრაცია. ამის შესახებ შამბამ „საზოგადოებრივი პალატის“ სხდომაზე განაცხადა.

„უბრალოდ, რაღაც დროის განმავლობაში, ამ საკითხის მიმართ ლოიალურობას ავლენდნენ, თვალს ხუჭავდნენ, არ მოითხოვდნენ. ახლა ამას ითხოვენ. ეს არ ნიშნავს იმას, რომ ისინი დაუყოვნებლივ გაიწვევენ ჯარში, თუმცა სწავლის დასრულების შემდეგ, თუ ამ დრომდე არ ამოქმედდება კანონი ორმაგი მოქალაქეობის შესახებ, შესაძლოა, რუსეთში დარჩენის შემთხვევაში, ჯარში გაიწვიონ“, - განმარტა მან.

შამბამ აღნიშნა, რომ, ერთი მხრივ, კმაყოფილია, როცა აფხაზი სტუდენტები სწავლის დასრულების შემდეგ სამშობლოში ბრუნდებიან. თუმცა, მან ასევე აღიარა, რომ ახალგაზრდა პროფესიონალებს აფხაზეთში სამუშაოს შოვნა უჭირთ. ”თუმცა, იქაც [რუსეთში] არ არის ყიალი საჭირო”, - დასძინა მან.

რუსეთის სახელმწიფო დუმამ მოსკოვსა და სოხუმს შორის "ორმაგი მოქალაქეობის" საკითხების დარეგულრების შესახებ შეთანხმების რატიფიცირება 2023 წლის მაისში მოახდინა.

საუბარია შეთანხმებაზე, რომელსაც რუსეთის საგარეო უწყების ხელმძღვანელმა სერგეი ლავროვმა და აფხაზეთის დე ფაქტო რესპუბლიკის "საგარეო საქმეთა მინისტრმა" ინალ არძინბამ მოსკოვში 2022 წლის 27 სექტემბერს მოაწერეს ხელი.


დოკუმენტში აღნიშნულია, რომ „პირები, რომლებიც არიან ორივე მხარის მოქალაქეები, გადიან სამხედრო სამსახურს იმ მხარეზე, რომლის ტერიტორიაზეც მუდმივად ცხოვრობენ გაწვევის მომენტში“.