2025 წლის 12-13 იანვარს სახალხო დამცველის რწმუნებულებმა ფოთში, მათ შორის, თბილისში, ოზურგეთსა და  ლანჩხუთში დამატებით 16 დაკავებული მოქალაქე მოინახულეს.
მათგან ოთხი პოლიციის მხრიდან შესაძლო ძალის გადამეტებასა და არასათანადო მოპყრობაზე მიუთითებს.

აპარატის ინფორმაციით, თითოეულ შემთხვევასთან დაკავშირებით სახალხო დამცველის აპარატმა, შემდგომი სამართლებრივი რეაგირების მიზნით, სპეციალურ საგამოძიებო სამსახურს მიმართა.

მათივე ცნობით, სახალხო დამცველი მოახდენს გამოძიების მონიტორინგს.

,,აქვე უნდა აღინიშნოს, რომ სამწუხაროდ, ღამის განმავლობაში დაფიქსირდა შემთხვევა, როდესაც შინაგან საქმეთა სამინისტროს ერთ-ერთ შენობაში სახალხო დამცველის რწმუნებულს შესვლისა და დაკავებულების დაუყოვნებლივი მონახულების შესაძლებლობაარ მიეცა. არაერთი დაკავებული მიუთითებს, რომ ისინი უსაფუძვლოდ დააკავეს და მათ არ განუმარტეს კანონმდებლობით გარანტირებული უფლებები. ასევე მიუთითებენ პოლიციის მხრიდან სიტყვიერ შეურაცხყოფაზე. ერთ-ერთ დაკავებულს გამოცხადებული აქვს შიმშილობა უსაფუძვლო დაკავების გამო პროტესტის გამოხატვის მიზნით.'', - აღნიშნულია გავრცელებულ ინფორმაციაში.

ომბუდსმენის აპარატი მოუწოდებს შინაგან საქმეთა სამინისტროს, რომ უზრუნველყოს, სახალხო დამცველის რწმუნებულებს არ შეექმნათ დაბრკოლებები დაკავებულთა მონახულების პროცესში.