გაგრაში, სოციოლოგთა კიდევ ერთი ჯგუფი გამოჩნდა, რომელიც წინასაარჩევნო გამოკითხვას ატარებს. ამის შესახებ საინფორმაციო სააგენტო „აიაშარა“ წერს.

მათივე ცნობით, ისინი რუსეთის ქალაქ სამარიდან ჩავიდნენ ოკუპირებულ აფხაზეთში და ნებართვის დოკუმენტებიდან, მათ მხოლოდ „აფხაზეთის პრეზიდენტის ადმინისტრაციის ხელმძღვანელის ხელმოწერილი წერილის ფოტოასლი აქვთ თან“.



მანამდე, აფხაზური ტელეგრამის არხები ავრცელებდნენ ინფორმაციას, „სრულიად რუსეთის საზოგადოებრივი აზრის კვლევის ცენტრის“ (ВЦИОМ) მიერ ჩატარებული სოციოლოგიური გამოკითხვის შესახებ, რომელიც „საპრეზიდენტო“ არჩევნებს შეეხებოდა.

დე ფაქტო ცესკოს თანახმად, ეს გამოკითხვა „არ იყო შეთანხმებული აფხაზეთის სტატისტიკის სახელმწიფო კომიტეტთან. შესაბამისად, ის მოქმედი კანონმდებლობის დარღვევით ჩატარდა“.

მათ მოუწოდეს მოქალაქეებს, თავი შეიკავონ რუსეთიდან შემოსულ სატელეფონო და სოციალურ გამოკითხვებში მონაწილეობისგან, რომლის მიზანია ამომრჩეველთა მოსაზრებების გამოვლენა რესპუბლიკის „პრეზიდენტის“ მოახლოებული არჩევნების შედეგებთან დაკავშირებით.

ცმობისთვის, ოკუპირებულ აფხაზეთში 15 თებერვალს დაგეგმილ არჩევნებში, 5 კანდიდატი იბრძოლებს „პრეზიდენტობისთვის“, მათ შორის, "პრეზიდენტის" მოვალეობის შემსრულებელი, - ბადრა გუნბა და ეკონომიკის ყოფილი "მინისტრი", აფხაზი ოპოზიციონერი - ადგურ არძინბა. ის მონაწილეობდა 2024 წლის ნოემბრის საპროტესტო აქციებში, რომელთაც ასლნა ბჟანია გადადგომა და რუსეთთან საინვესტიციო ხელშეკრულების ჩაგდება მოჰყვა.