ზუგდიდის სოფელ ინგირის ბაგა-ბაღის, „წითელქუდას“ დამფუძნებელსა და თანამშრომლებს ერთთვიანი და ექვსთვიანი ხელშეკრულებები გაუფორმეს. ამის შესახებ სოციალურ ქსელში ამავე ბაღის დამფუძნებელმა და დირექტორმა ხათუნა გოგუამ პოსტი გამოაქვეყნა.

ის წერს, რომ „ინგირის ყოფილი საავადმყოფოს შენობაში დევნილი, მოწყვლადი ჯგუფის და ეთნიკური უმცირესობის ხელშეწყობის მიზნით დაფუძნებულ საბავშვო ბაღში დასაქმებულია 22 პერსონალი, აქედან 16 დევნილი და სოციალურად დაუცველი ქალია“.


რადიო „ათინათთან“ გოგუა ამბობს, რომ „წითელქუდაში“ მუშაობის 28 წლიანი გამოცდილება აქვს, თუმცა პირველი შემთხვევაა, როდესაც მსგავსი პირობების შრომითი ხელშეკრულება გაუფორმეს.

ბაღის დირექტორის თქმით, მას და კიდევ 8 ადამიანს ერთთვიანი კონტრაქტი აქვთ, რომლის ამოწურვის შემდეგ, არ იციან რჩებიან თუ არა უმუშევარი, რადგან, როგორც აღნიშნავს, ამ დრომდე, მას სკოლამდელ სააღმზრდელო დაწესებულებათა მართვის ცენტრიდან და ზუგდიდის მერიიდან არავინ შეხმიანებია.

„მშობლებმა მერიაშიც შეიტანეს წერილი, რომლის კონტექსტი მე არ ვიცი, თუმცა, სავარაუდოდ, ეს სოლიდარობის წერილი იყო. გუშინ სამეურვეო საბჭომ ამის შესახებ მაცნობა.

ხვალ პირველი თებერვალია, ხელშეკრულების ამოწურვის ბოლო დღე, თუმცა ვერ გეტყვით უმუშევარი ვრჩებით თუ არა. გუშინ, ბაღების მართვის ცენტრს დავუკავშირდი და მან მითხრა, რომ დღის ბოლომდე მომაწოდებდა ინფორმაციას, თუმცა მე ვერ მივიღე პასუხი. ამიტომ დავწერე პოსტიც, იქნებ ამას გამოეხმაურონ.

ამ დღეების განმავლობაში, ჩვენ სტრესულ მდგომარეობაში ვმუშაობდით. შეშფოთებულია მთელი კოლექტივი. ერთ-ერთი თანამშრომელი შეუძლოდ გახდა. მას დიაბეტი აქვს და მისი ჯანმრთელობის მდგომარეობა გაუარესდა და ძალიან ცუდად არის“, - გვეუბნება გოგუა.

ჩვენს შეკითხვას, მსგავსი პირობების შრომითი ხელშეკრულების გაფორმება არის თუ არა პოლიტიკური მოტივით განპირობებული, გვპასუხობს, რომ ცალსახად ასეა, რადგან სხვა მიზეზი არ არსებობდა.

„რა თქმა უნდა, სხვა მოტივი აქ არ არსებობს. ძალიან ხშირად მესმოდა, რომ ჩვენს ბაღს ოპოზიციურ პოლიტიკურ პარტიასთან აკავშირებდნენ. ამ დროს, მე ვაფიქსირებ ღიად, რომ ჩვენს ბაღს არანაირი პოლიტიკური მიმართულება არასდროს არ ჰქონია და არც უნდა ჰქონდეს, ბაღში პოლიტიკაზე არ უნდა მუშაობდნენ, მაგრამ სხვა რა უნდა დავარქვა ამას. 28 წლის განმავლობაში ეს პირველად ხდება“, - დასძენს რესპონდენტი.

მისივე განმარტებით, ხელშეკრულებას არცერთი თანამშრომელი არ აწერს ხელს და აპირებენ ბრძოლის გაგრძელებას სამართლებრივი მეთოდებით.

პოსტის გამოქვეყნების შემდეგ, მშობლები, საკუთარი ინიციატივით, აცხადებენ გაფიცვას და ბაღიდან ბავშვები გაჰყავთ.

„გავიგეთ რაც ხდება, ვნახეთ პოსტი და ვეწინააღმდეგებით ამ უსამართლობას, რა თქმა უნდა, ჩვენთვის მნიშვნელოვანია ბაღი და თანამშრომლები, სწორედ ამიტომ დაგვყავს ამ ბაღში ბავშვები. მიუღებელია ეს ყოველივე, 9 თანამშრომელი კი არა, ერთიც არ უნდა გაუშვან ამ ბაღიდან. ჩვენ დღეს ვიფიცებით“, - თქვა ერთ-ერთმა მშობელმა.

საკითხთან დაკავშირებით, ჩვენ ზუგდიდის სკოლამდელ სააღმზრდელო დაწესებულებათა მართვის ცენტრს დავუკავშირდით. მათგან კომენტარი ვერ მივიღეთ და იურისტთან გადაგვამისამართეს, რომელმაც გვითხრა, რომ მოწოდებული ინფორმაციის საფუძველზე გააფორმა ხელშეკრულებები და არ დაინტერესებულა საკითხის შინაარსით.

ზუგდიდის მერიის პრესსამსახურში რადიო "ათინათს" განუცხადეს, რომ "ყველა თანამშრომელს კანონის სრული დაცვით გაუფორმდა ხელშეკრულება".

მასალა განახლდება