„სოციალური სამართლიანობის ცენტრი“ ეხმიანება სამოქალაქო აქტივისტისა და ზუგდიდის აქციების მედროშის, შალვა ესართიას დაკავებას და მოუწოდებს შინაგან საქმეთა სამინისტროს, დაუყოვნებლივ გაათავისუფლოს ის. ამის შესახებ ინფორმაციას ორგანიზაცია საკუთარ ვებ გვერდზე ავრცელებს.

მათი თქმით, 29 იანვარს, ესართიამ აქციაზე პერფორმანსი მოაწყო და ბიძინა ივანიშვილის ფიტული დაწვა. ეს ფაქტი კი, ორგანიზაციის განმარტებით, საეჭვოდ ემთხვევა სიმბოლურ აქტს და აჩენს ეჭვებს, სავარაუდო პოლიტიკური შურისძიების შესახებ.

„ მიუხედავად იმისა, რომ ნიღბის ტარება ისედაც მაღალ ჯარიმას ითვალისწინებს, პოლიცია პროტესტის იმ მონაწილეებს, რომელთა დასჯა განსაკუთრებული სიმკაცრით სურს, სხვადასხვა ფორმალური საფუძვლით ნიღბის ტარების სამართალდარღვევას პოლიციელის მოთხოვნისადმი დაუმორჩილებლობის მუხლსაც უფარდებს, რაც პასუხისმგებლობის გამკაცრების საფუძველი ხდება. შალვა ესართიას საქმე სწორედ ამ მანკიერი პრაქტიკის გაგრძელებაა. აღსანიშნავია, რომ პოლიციელის მოთხოვნისადმი დაუმორჩილებლობა უფრო მაღალ ჯარიმას და ნიღბის ტარებისგან განსხვავებით, ადმინისტრაციულ პატიმრობასაც ითვალისწინებს.- აღნიშნავენ ცენტრში.

ისინი ასევე მოუწოდებენ შსს-ს, რომ აღმოფხვრას დაკავებული პირისთვის ადვოკატთან და ოჯახის წევრებთან დაკავშირების გაჭიანურების პრაქტიკა.

შეგახსენებთ, ესართია ზუგდიდში, პროტესტის 64-ე დღეს დააკავეს. პარტია "დროას" რეგიონული წარმომადგენლის, მარიამ სიჭინავას თქმით, აქტივისტს სამართალდარღვევათა კოდექსის 173-ე მუხლის დარღვევას ედავებიან, რაც პოლიციისთვის დაუმორჩილებლობას გულისხმობს.

ამავე თემაზე:

ზუგდიდში სამოქალაქო აქტივისტი შალვა ესართია დააკავეს