„რუსეთ-აფხაზეთის საზღვარზე“ განთავსებული ადლერის საავტომობილო გამშვები პუნქტის რეკონსტრუქცია იგეგმება, შესაბამის პროექტს „როსგრანსტროი“ ამზადებს.

ამის შესახებ „აფსნიპრესი“ წერს, სოჭის ადმინისტრაციის პრესსამსახურზე დაყრდნობით.  ამავე ცნობით, ეს არის ყველაზე დატვირთული საავტომობილო გამშვები პუნქტი რუსეთში, რომელსაც ყოველწლიურად 13 მილიონი მოქალაქე და 2,7 მილიონი მანქანა კვეთს.

„ყოველდღიურად აქ სახელმწიფო საზღვარს 35 ათასზე მეტი ადამიანი და 8 ათასამდე მანქანა კვეთს. საკურორტო სეზონზე ეს მაჩვენებლები კიდევ უფრო მაღალია. რეკონსტრუქცია გაზრდის მის სიმძლავრეს და შეამცირებს რიგებს როგორც მძღოლებისთვის, ასევე ფეხით მოსიარულეებისთვის“, - განაცხადა სოჭის მერის მოადგილემ ვიაჩესლავ ბაუერმა.

მისივე ცნობით, ახალი პროექტი „28 ზოლის გაყვანის საშუალებას იძლევა, რაც საგუშაგოს გამტარუნარიანობას 80,5 ათას ადამიანამდე და დღეში 14 ათას მანქანამდე გაზრდის, რაც კომფორტულ სამუშაო პირობებს შეუქმნის „საკონტროლო ორგანოების თანამშრომლებს და მოქალაქეებს, რომლენიც „აფხაზეთის საზღვარს კვეთენ“.

"ადლერის" საგუშაგოს რეკონსტრუქციისთვის საჭირო დოკუმენტაციის მომზადებაზე რუსული მხარე, 2023 წლის აგვისტოშიც აცხადებდა.

მაშინ მედია წერდა, რომ ფსოუს ეწ. საკონტროლო - გამშვებ პუნქტზე გამტარუნარიანობის გასაზრდელად ძველი ხიდის კაპიტალური რემონტი იგეგმებოდა.