პარტია „დროას“ რეგიონული წარმომადგენელი და აქტივისტი მარიამ სიჭინავა სოციალურ ქსელში წერს, რომ ზუგდიდში პოლიციის ერთ-ერთი თანამშრომელი დაემუქრა და სიტყვიერი შეურაცხყოფა მიაყენა.
ის რადიო „ათინათთან“ ამბობს, რომ შემთხვევა 5 თებერვალს, სახელმწიფო რწმუნებულის ადმინისტრაციის შენობასთან მიმდინარე აქციაზე მოხდა, მას შემდეგ, რაც აქტივისტმა პროტესტის ნიშნად ლაზერი გამოიყენა.

„კიბეებზე, სადაც პოლიციელები დგანან, ლაზერს ვანათებდი. ის გამოვიდა და შელაპარაკება სცადა, საუბარი დაიწყო ჩემთან და მითხრა, რომ ქალაქში ბევრი ადამიანი ვერ მიტანს და აქ რომ ის არ იდგეს, ვიღაცები „გამპუტავდნენ“ მე ვუთხარი, ამ ქალაქში დიდი ხანია ვცხოვრობ და მსგავსი ფაქტი არ მახსოვს მეთქი. ამაზე პასუხად გამცა, ჩემი ნება რომ იყოს, ორი კილომეტრის იქეთ წაგიყვანდი და დაგმარხავდიო. ძალიან აღშფოთებულმა ვუთხარი, ფეხებსაც ვერ მომჭამ მეთქი, ამაზე პასუხად „ფეხები კი არა სხვა რამე მომჭამე თუგინდაო“, - გვეუბნება სიჭინავა.

მისი თქმით, აღნიშნულ ინციდენტთან დაკავშირებით, ის სპეციალურ საგამოძიებო სამსახურში საჩივრის შეტანას აპირებს, თუმცა, როგორც გვეუბნება, „ქართული ოცნების“ ხელისუფლების პირობებში სამართლიანი გამოძიების იმედი არ აქვს.