ზუგდიდის რაიონულმა სასამართლომ, სამოქალაქო აქტივისტის, ცაბუნია ვართაგავას მიმართ გინების ფაქტზე, ზუგდიდის მერიის ა(ა)იპ-ის თანამშრომელი 500 ლარით დააჯარიმა. ამის შესახებ აქტივისტი სოციალურ ქსელში წერს.

რადიო „ათინათთან“ ვართაგავა ამბობს, რომ სიტყვიერი შეურაცხყოფის შემთხვევა ზუგდიდში, სახელმწიფო რწმუნებულის ადმინისტრაციის შენობასთან მიმდინარე აქციაზე, 14 იანვარს მოხდა. მისივე თქმით, იქამდე, მერიის თანამშრომელმა აქტივისტს უხამსი შინაარსის გამომხატველი ჟესტი უჩვენა.

„კიბეებზე, სადაც პოლიციელები დგანან, იმ მწკრივში იდგა ეს ადამიანი. ჯერ შუა თითი მიჩვენა. ვკითხე, მე მიჩვენებდა თუ არა, რაც დამიდასტურა და მერე შემაგინა, ხელმეორედაც გაიმეორა. ავედი კიბეებზე, მაინტერესებდა სახელი და გვარი, თუმცა პოლიციელებმა მეგობრულად გაიყვანეს გვერდზე. მათ მითხრეს, რომ არ იცნობდნენ მას, თუმცა ინციდენტამდე მასთან მეგობრულად საუბრობდნენ. იმავე დღეს გადავწყვიტე საჩივრის შეტანა და 31 იანვარს შეადგინეს სამართალდარღვევის ოქმი. მთელი ორი კვირა დასჭირდათ. მერიის ააიპ-ის თანამშრომელი სასამართლოზე ამტკიცებდა, რომ ჩემთვის არ უგინებია, მხოლოდ უმისამართოდ იგინებოდა“, - განმარტა ვართაგავამ.

მისივე თქმით, საქმეზე გადაწყვეტილება მოსამართლემ გვანცა ვარდანიძემ გამოაცხადა. როგორც აქტივისტი აღნიშნავს, მნიშვნელოვანია, რომ მოქალაქეებმა, ვის მიმართაც შეურაცხყოფის ფაქტი მოხდება, რეაგირება მყისიერად მოახდინონ და მიუხედავად სამართალდამცავი სისტემის მიმართ არსებული უნდობლობისა, იჩივლონ.