2025 წლის 13 თებერვალს აფხაზეთის დე ფაქტო რესპუბლიკის „უზენაეს სასამართლოში“ შევიდა ადმინისტრაციული სარჩელი „პრეზიდენტის“ მოვალეობის შემსრულებლის ბადრა გუნბას 2024 წლის 5 დეკემბრის ბრძანებულების „შერეული ტიპის სპეციალური ეკონომიკური ზონის „ამრას“ არსებობის ვადამდე შეწყვეტის შესახებ“ ბათილად ცნობის თაობაზე.
მოსარჩელე მხარე შპს „რუსეთი - აფხაზეთი სინგაპურის სავაჭრო -საინვესტიციო კორპორაცია“ აცხადებს, რომ ეს დადგენილება არღვევს „აფხაზეთის რესპუბლიკის მოქმედ კანონს „სპეციალური ეკონომიკური ზონების შესახებ“. ამასთან დაკავშირებით მოსარჩელე ითხოვს დადგენილების ძალადაკარგულად გამოცხადებას და შპს „Р-АСТИКО“ -ს დარღვეული უფლებებისა და კანონიერი ინტერესების აღდგენას.

ე.წ. საგარეო საქმეთა მინისტრის მოვალეობის შემსრულებელმა სერგეი შამბამ საინფორმაციო სააგენტო „აფსნიპრესს“ განუცხადა, რომ მას არანაირი კავშირი არ აქვს და არანაირად არ ლობირებს პროექტს გალის რაიონში სპეციალური ეკონომიკური ზონის შექმნის შესახებ.

„მე არაფერი მაქვს საერთო გალის რეგიონის სპეციალურ ეკონომიკურ ზონასთან და არასდროს მიმიღია გადაწყვეტილება ამის შესახებ“, - თქვა მან 11 თებერვალს აფხაზური ტელევიზიის პირდაპირ ეთერში დებატებისას „პრეზიდენტობის“ კანდიდატის რობერტ არშბას ბრალდების საპასუხოდ.

2024 წლის იანვარში, აფხაზეთის დე ფაქტო რესპუბლიკის ე.წ. პრეზიდენტის მოვალეობის შემსრულებელმა ბადრა გუნბამ ხელი მოაწერა განკარგულებას, გალის რაიონში "განსაკუთრებული ეკონომიკური ზონის" გაუქმების შესახებ, წერს „აფსნიპრესი“.

აფხაზური მედიის ცნობით, გალში "განსაკუთრებული ეკონომიკური ზონა" - „ამრა“, 2016 წელს, მაშინდელი „პრეზიდენტის“ რაულ ხაჯიმბას განკარგულებით შეიქმნა.