დღეს, 15 თებერვალს, აფხაზეთის დე ფაქტო რესპუბლიკაში ვადამდელი „საპრეზიდენტო“ არჩევნები იმართება.
მედიის ინფორმაციით, უბნები დილის 8:00 საათზე გაიხსნა და 20:00 საათზე დაიხურება.

დე ფაქტო ცესკოს ცნობით, ერთიანი საარჩევნო სიაში 135 ათასამდე ამომრჩეველია რეგისტრირებული. კენჭისყრისთვის მომზადებულია 152 საარჩევნო უბანი.

ოკუპირებული აფხაზეთის ფარგლებს გარეთ არჩევნები რუსეთის ორ ქალაქში (მოსკოვსა და ჩერქესკში) გაიმართება.

არჩევნების წინა დღეს თურქეთის ქალაქ საკარიაში, სადაც აფხაზური დიასპორის მნიშვნელოვანი ნაწილი ცხოვრობს, საარჩევნო უბანი დაიხურა.

"აფსნიპრესის" თანახმად, არჩევნების დასაკვირვებლად სოხუმში სხვადასხვა ქვეყნიდან 100-ზე მეტი საარჩევნო ექსპერტი ჩავიდა. რუსეთის ცენტრალურმა საარჩევნო კომისიამ მიიღო გადაწყვეტილება, არ გაგზავნოს თავისი წარმომადგენლები საპრეზიდენტო არჩევნებზე.

ცმობისთვის, „პრეზიდენტობისთვის“ 5 კანდიდატი იბრძვის. მათ შორის ყველაზე დიდ კონკურენტებად ბადრა გუნბა და ადგურ არძინბა მიიჩნევიან. 

"პრეზიდენტის" მოვალეობის შემსრულებელი, ბადრა გუნბა, ბჟანიას თანაგუნდელია და კრემლის ფავორიტად ითვლება. მისი წინასაარჩევნო კამპანიის ნაწილი გახდა, მოსკოვში ვიზიტი, რასაც მოჰყვა რუსული ელექტროენერგიის კომერციული ნაკადის დაფინანსება და სოხუმის აეროპორტში პირველი საცდელი რეისის შესრულება. 

ეკონომიკის ყოფილი "მინისტრი", აფხაზი ოპოზიციონერი, ადგურ არძინბა, მონაწილეა 2024 წლის საპროტესტო აქციის, რომლის შედეგადაც გადადგა ყოფილი აფხაზი ლიდერი ასლან ბჟანია და ჩავარდა სოხუმსა და მოსკოვს შორის საინვესტიციო ხელშეკრულების რატიფიცირება.

„პრეზიდენტობის“ დანარჩენი კანდიდატები არიან:

აფხაზეთის ყოფილი "სავაჭრო წარმომადგენელი მოსკოვში" - ოლეგ ბარციცი;

"კონტროლის პალატის" ყოფილი ხელმძღვანელი - რობერტ არშბა;

კომერციული "შავი ზღვის განვითარების ბანკის" გამგეობის თავმჯდომარე, ადგურ ხურხუმალი.

„საპრეზიდენტო“ არჩევნებში მონაწილეობაზე, ჯანმრთელობის მდგომარეობის გამო, უარი განაცხადა ოპოზიციონერმა „დეპუტატმა“ კან კვარჩიამ. აფხაზური მედიის ცნობით, თავისი კანდიდატურები ასევე მოხსნეს ბიზნესმენმა ბესლან კვიცინიამ და „სახალხო პარტიის“ლიდერმა შამილ აძინბამ.

თუ პირველივე ტურში, „სახელისუფლებო“ კანდიდატმა 50%-ზე ნაკლები ხმა მოიპოვა, მეორე ტური შედგება, რაც ადგილობრივი ექსპერტების აზრით, ოპოზიციური კანდიდატის გამარჯვების შანსებს ზრდის, რადგან სხვა დანარჩენი კანდიდატები სწორედ მას დაუჭერენ მხარს.

ცნობისთვის, ყოფილი “პრეზიდენტი” ასლან ბჟანია თანამდებობიდან 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.