აფხაზეთის თვითგამოცხადებული რესპუბლიკის ცენტრალური საარჩევნო კომისიის თავმჯდომარემ დიმიტრი მარშანმა არჩევნების მეორე ტურის ჩატარების შესახებ განაცხადა. მასში მონაწილეობას ბადრა გუნბა და ადგურ არძინბა მიიღებენ.

„ნებისმიერ შემთხვევაში იქნება მეორე ტური, რომელშიც გუნბა ბადრა და არძინბა ადგური მიიღებენ მონაწილეობას“, - განუცხადა მან ჟურნალისტებს.

მისივე ინფორმაციით, დე ფაქტო ცესკო წინასწარ შედეგებს 16 თებერვალს გამოაცხადებს, იუწყება სააგენტო „აფსნიპრესი“.

წინასწარი შედეგების მიხედვით:

ბადრა გუნბამ ხმების 46% დააგროვა
ადგურ არძინბამ - 37%
რობერტ არშბამ - 7%
ოლეგ ბარციცმა - 4%
ადგურ ხურუმალმა - 1%

ოკუპირებულ აფხაზეთში ვადამდელი „საპრეზიდენტო“ არჩევნები, გუშინ, 15 თებერვალს გაიამრთა. მასში კენჭს 5 კანდიდატი იყრიდა. მათ შორის, ყველაზე დიდ კონკურენტებად ბადრა გუნბა და ადგურ არძინბა მიიჩნევიან.

"პრეზიდენტის" მოვალეობის შემსრულებელი, ბადრა გუნბა, ბჟანიას თანაგუნდელია და კრემლის ფავორიტად ითვლება.


ეკონომიკის ყოფილი "მინისტრი", აფხაზი ოპოზიციონერი, ადგურ არძინბა, მონაწილეა 2024 წლის ნეომბრის პროტესტის, შედეგადაც გადადგა ყოფილი აფხაზი ლიდერი ასლან ბჟანია და ჩავარდა სოხუმსა და მოსკოვს შორის საინვესტიციო ხელშეკრულების რატიფიცირება.


ცნობისთვის, ყოფილი “პრეზიდენტი” ასლან ბჟანია თანამდებობიდან 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.