ბალდის ინვესტორი კომპანიის, „კანიონი 350-ის“ დირექტორი, გიორგი მერკვილაძე, სენაკის რაიონულმა სასამართლომ სისხლის სამართლის საქმეში დამნაშავედ ცნო. ბალდის მოძრაობის წევრზე ფიზიკური ძალადობის გამო, მას სისხლის სამართლის კოდექსის 126-ე მუხლის პირველი ნაწილის მიხედვით დაეკისრა ჯარიმა. ამის შესახებ ინფორმაციას სოციალურ ქსელში მოძრაობის წევრები აქვეყნებენ.

ისინი ამბობენ, რომ თავდასხმა 2023 წლის 10 ოქტომბერს, დაცული ტერიტორიების ოფისში მოხდა, როდესაც ბალდის მოსახლეობის ნაწილმა ინვესტორთან შეხვედრაზე დასწრების სურვილი გამოთქვა.

„გიორგი მერკვილაძე ბრალდებულია კიდევ ერთ, მოსახლეობაზე ჯგუფური ძალადობის საქმეში, რომლის განაჩენსაც დღემდე ველოდებით. კომპანია “კანიონი350” დაცული ტერიტორიების სააგენტოს ოფიციალური პარტნიორი კომპანიაა. სწორედ ერთმანეთთან კორუფციული გარიგების გზით, ადგილობრივებისგან მალულად გასხვისდა ბალდის კანიონი და მდინარეზე ჩასვლა 40 წლით აგვეკრძალა. დღეს, სოფელ ბალდის მოსახლეობა მე-500 დღეს ატარებს საპროტესტო კარავში მოთხოვნით: გაუქმდეს უკანონოდ გაცემული იჯარის ხელშეკრულება დაუბრუნდეს ხალხს ის, რაც მისია“, - აღნიშნულია ინფორმაციაში.

შეგახსენებთ, თვეებია, ბალდელების ნაწილი კომპანია "კანიონ 350"-ს სამუშაოების შეჩერებას ითხოვს და ტერიტორიის გასხვისებას უკანონოს უწოდებს.

სახელმწიფო უწყებაში კი განმარტავენ, რომ ყველა სახის სამუშაო კანონის სრული დაცვით მიმდინარეობს.

კომპანიამ ორი წლის განმავლობაში 3 მილიონ ლარამდე ინვესტიცია უნდა განახორციელოს, მომდევნო 3 წლის ვადაში კი ბუნების ძეგლზე მოაწყოს ეკოტურისტული ინფრასტრუქტურა - ვიზიტორთა ცენტრი, როლერი ატრაქცია, კიდული ბილიკი და საფეხმავლო ბილიკი.