რუსეთის ფედერაციამ „უცხოეთის აგენტების“ სიაში ოკუპირებული აფხაზეთიდან კიდევ ორი ჟურნალისტი შეიყვანა - სააგენტო „აიაშარას“ რედაქტორი ნიზფა არშბა და გამოცემა „ნუჟნაია გაზეტას“ დამფუძნებელი, იზიდა ჭანია.

ორივე მათგანის სახელი შესულია რუსეთის იუსტიციის სამინისტროს მიერ განახლებულ „უცხოეთის აგენტების“ სიაში.

„უნდა ითქვას, რომ დღეს აფხაზეთში დამოუკიდებელი მედიის ყველა ხელმძღვანელი გამოცხადდა უცხოურ აგენტად“, - წერს „ნუჟნაია გაზეტას“ ადმინი ტელეგრამის არხზე.

აფხაზი ჟურნალისტი ნიზფა არშბა რუსეთის იუსტიციის სამინისტროს მიერ მისი „უცხოური აგენტების“ სიაში შეყვანას ასე გამოეხმაურა:

„რაც შეეხება ჩემს უცხოურ აგენტად გამოცხადებას. მე არ ვარ რუსეთის ფედერაციის მოქალაქე და არც არასდროს ვყოფილვარ. ”და აფხაზეთი არ არის რუსეთი”, - თქვა არშბამ.

უფრო ადრე, 7 მარტს, რუსეთის იუსტიციის სამინისტრომ ამავე სიას დაამატა აფხაზი პოლიტოლოგი, ჟურნალისტი, „ჩეგემსკაია პრავდას“ რედაქტორი ინალ ხაშიგი.

მოსკოვის გადაწყვეტილებაზე ის ამბობს, რომ მის “მომავალ პროფესიულ საქმიანობაზე ეს სტატუსი, დიდი ალბათობით, არ აისახება”.

“როგორც ადრე ვწერდი აფხაზეთში და მის გარშემო მიმდინარე მოვლენებზე, ასევე გავაგრძელებ წერას და საუბარს”, – დაწერა მან ტელეგრამში.

ეს იყო პირველი შემთხვევა, როდესაც აფხაზი ჟურნალისტი უცხო ქვეყნის აგენტად იქნა გამოცხადებული.