„ზუგდიდდასუფთავების“ ცენტრი განცხადებას ავრცელებს, რომელშიც აღნიშნავს, რომ სასოფლო ტერიტორიაზე მცხოვრები მოსახლეობის 90% არ იხდის დასუფთავების მოსაკრებელს, რაც, მათი განმარტებით, ითვლება კანონდარღვევად და ექვემდებარება კანონიერ რეაგირებას.

ისინი მოსახლეობის ნაწილს დავალიანების დროულად დაფარვისკენ მოუწოდებენ.

ამასთან, დასუფთავების სამსახურში ამბობენ, რომ ნაგვის კონტეინერები განკუთვნილია მხოლოდ საყოფაცხოვრებო ნარჩენებისათვის. მსგავს ურნებში კი დაუშვებელია აალებადი ნივთიერებების, სამშენებლო და სხვა სახის მყარი ნარჩენების ჩაყრა, რაც აზიანებს სპეცტექნიკას და ურნებს.

„სამწუხაროდ, ბოლო პერიოდში, გახშირდა პლასტმასის ურნების, მათ შორის ახალი ნაგავშემკრები კონტეინერების დაზიანების ფაქტები. მოგახსენებთ რომ მსგავსი ქმედება ითვალისწინებს საჯარიმო სანქციებს“, - აღნიშნულია ინფორმაციაში.

მათივე განმარტებით, სამშენებლო და სხვა სახის მყარი ნარჩენების გატანისთვის შექმნილია მობილური ჯგუფი და საჭიროების შემთხვევაში მოქალაქეებს შეუძლიათ დასუფთავების სამსახურს დაუკავშირდნენ.