სოხუმში მოქმედი საზოგადოებრივი ორგანიზაციების ნაწილი თვითგამოცხადებული რესპუბლიკის ე.წ. საგარეო საქმეთა სამინისტროს ხელმძღვანელის სერგეი შამბას გადადგომას ითხოვს.
„ეხო კავკაზას“ თანახმად, სამოქალაქო საზოგადოების წარმომადგენლები უკმაყოფილებას გამოთქვამენ, „ხელისუფლების“ უმოქმედობით რუსეთის ხელისუფლების მიერ „აფხაზეთის მოქალაქეების“ წინააღმდეგ დაწესებულ სანქციებთან დაკავშირებით.

Aamta Foundation-ის მიმართვაში (რეჟისორი ნატალი სმირ) ნათქვამია, რომ ბოლო მოვლენები “აფხაზეთის სუვერენიტეტს კითხვის ნიშნის ქვეშ აყენებს”. მიმართვის ავტორები ოკუპირებული აფხაზეთის ე.წ. პრეზიდენტს, ბადრა გუნბას მიმართავენ, რომ მიიღოს „გადამწყვეტი ზომები“ მათ შორის, გადადგეს სერგეი შამბა, რომელიც ვერ ასრულებს თავის მოვალეობას“.

საზოგადოებრივი ორგანიზაცია „ახიაცას“ (ხელმძღვანელი ახრა ბჟანია) შეფასებით, სანქციები არის „უსამართლო, შორს მიმავალი და ზიანს აყენებს რუსეთ-აფხაზეთის ურთიერთობებს“.

„გამაოგნებელია, რომ აფხაზეთის ხელისუფლება დუმს სიტუაციაზე, მიუხედავად იმისა, რომ მათი პირდაპირი პასუხისმგებლობაა საკუთარი მოქალაქეების უფლებებისა და ინტერესების დაცვა, ასევე რუსეთსა და აფხაზეთს შორის გაუგებრობების მოგვარება, რამაც შეიძლება გამოიწვიოს დაძაბულობა მეგობარ ქვეყნებს შორის ურთიერთობებში“, - ნათქვამია განცხადებაში.

განცხადება აფხაზეთის ჟურნალისტთა კავშირის თავმჯდომარემ რუსლან ხაშიგმაც გააკეთა. მან კოლეგებს სთხოვა, გაესაჩივრებინათ „უცხოელი აგენტის“ სტატუსი რუსეთის ფედერაციის სასამართლოებში.

„რა თქმა უნდა, კარგად ვიცი მომავალი პროცესის სირთულე, მაგრამ მიმაჩნია, რომ ეს ძალიან მნიშვნელოვანია, რადგან უცხოელი აგენტის სტატუსის გამოწვევა ერთდროულად არის საკუთარი უფლებების დაცვა და სიტყვის თავისუფლებისთვის ბრძოლა. ”აფხაზეთის ჟურნალისტთა კავშირი აპირებს გაგიწიოთ ყველა შესაძლო დახმარება და გარანტირებული იყოს მისი სოლიდარობა”, - მიმართა მან რუსეთში ”უცხოურ აგენტებად” გამოცხადებულ აფხაზ ჟურნალისტებს.

ცნობისთვის, მოსკოვმა აფხაზ ოპოზიციონერებს ლევან მიქაას და კან კვარჩიას რუსეთის მოქალაქეობა ჩამოართვა; 

რუსეთის იუსტიციის სამინისტრომ „უცხოური აგენტების“ სიაში შეიყვანა ჟურნალისტები ინალ ხაშიგი, იზიდა ჭანია და ნიზფა არშბა. 

2024 წლის აგვისტოს ბოლოს აფხაზურმა ტელეგრამის არხებმა გაავრცელეს ინფორმაცია, რომ თვითგამოცხადებული რესპუბლიკის მაშინდელმა „პრეზიდენტმა“ ასლან ბჟანიამ რუსეთის ფედერაციის ვიცე-პრემიერ ალექსანდრ ნოვაკთან შეხვედრაზე „აპარტამენტების კანონის" მოწინააღმდეგე ე.წ. დეპუტატებისთვის რუსეთის მოქალაქეობის ჩამორთმევის საკითხი განიხილა.

ამავე ცნობით, ბჟანიას 2024 წლის 20 სექტემბრამდე უნდა მიეწოდებინა მოსკოვისთვის ინფორმაცია აფხაზური ოპოზიციის იმ დეპუტატებისა და ლიდერების შესახებ, რომლებსაც აქვთ რუსეთის მოქალაქეობა და „მოქმედებენ რუსეთის ფედერაციის ინტერესებისა და რუსეთ-აფხაზური ურთიერთობების განვითარების საზიანოდ. ბჟანიამ არ უარყო, რომ ეს საკითხი განიხილებოდა, თუმცა განაცხადა, რომ მას არ აუღია ვალდებულება, რუსული მხარისთვის ინფორმაციის მიწოდების შესახებ.