აფხაზეთის თვითგამოცხადებული რესპუბლიკის ახალმა ე.წ. პრეზიდენტმა ბადრა გუნბამ ხელი მოაწერა განკარგულებას ვლადიმერ დელბას „პრემიერ-მინისტრად“ დანიშვნის შესახებ.
ასლან ბჟანიას გადადგომამდე, ე.წ. პრემიერის პოსტს ალექსანდრე ანქვაბი იკავებდა.

2011-2014 წლებში ანქვაბი „პრეზიდენტის“ პოსტს იკავებდა.

ვლადიმერ დელბა მანამდე ორჯერ ასრულებდა „პრემიერ-მინისტრის“ მოვალეობას:

2014 წელს, „პრეზიდენტ“ ალექსანდრ ანქვაბის პოსტიდან გადადგომისას; მანამდე ის „ფინანსთა მინისტრის“ პოსტს იკავებდა;

მეორედ კი 2021 წელს, რა დროსაც მან კორონავირუსით დაინფიცირებული ანქვაბი მეორედ ჩაანაცვალა.

ასლან ბჟანიას „პრეზიდენტობისას“ დელბა ისევ „ფინანსთა მინისტრის“ იყო.

ოკუპირებული აფხაზეთის არჩეული „პრეზიდენტის“ ბადრა გუნბას ინაუგურაცია 2 აპრილს გაიმართა, ცერემონისა რუსეთის პრეზიდენტის ადმინისტრაციის აპარატის უფროსის პირველი მოადგილე სერგეი კირიენკო, ოკუპირებული ცხინვალის რეგიონის დე ფაქტო ლიდერი ალან გაგლოევი, "რუსეთისა და სამხრეთ ოსეთის ელჩები", ასევე ვენესუელის და სეპარატისტული დნესტრისპირეთის (მოლდოვა) წარმომადგენლები ესწრებოდნენ.

ყოფილი „პრემიერ-მინისტრი“ ანქვაბი გუნბას ინაუგურაციას არ დასწრებია, ტელეგრამის არხების თანახმად, მიზეზად მან ჯანმრთელობის მდგომარეობა დაასახელა.

მანამდე ცნობილი გახდა, რომ რუსეთის პრეზიდენტმა ვლადიმირ პუტინმა ბადრა გუნბა, 9 მაისს, ფაშიზმზე გამარჯვების 80 წლისთავის აღსანიშნავ ღონისძიებაზე მიიწვია.