სარეალიზაციო ქსელიდან სრულად არის ამოღებული „სოფლის ნობათის“ რძის ის კონკრეტული პარტია, სადაც აფლატოქსინ M1 დაფიქსირდა, – ამის შესახებ სურსათის ეროვნული სააგენტოს განცხადებაშია აღნიშნული.

ამავე ცნობით, პროდუქციის ამოღების პროცესს სააგენტოს ინსპექტირების ჯგუფები მთელი ქვეყნის მასშტაბით უწევენ ზედამხედველობას.

„კომპანია „ვიმ- ბილ-დან საქართველო“ აქტიურად თანამშრომლობს სააგენტოსთან და დარღვევის გამოვლენისთანავე, მყისიერად დაიწყო პროდუქციის ბაზრიდან გამოთხოვა. ამჟამად სარეალიზაციო ქსელში არსებული „სოფლის ნობათის“ პროდუქცია (რძე, მაწონი, არაჟანი, ხაჭო და სხვ.) სრულად შეესაბამება უვნებლობის სტანდარტებს“, - ვკითხულობთ განცხადებაში.

აქვე აღნიშნულია, რომ „სურსათის ეროვნული სააგენტო რძის გადამამუშავებელ კომპანიებს გეგმურად წელიწადში, მინიმუმ, 4-ჯერ მაინც ამოწმებს.

„შარშან სააგენტომ რძის მწარმოებელი ბიზნესსექტორი დაახლოებით, 1500-ჯერ შეამოწმა და 1031 ნიმუში აიღო, მათ შორის „ვიმ-ბილ-დან საქართველო“ 15- ჯერ შემოწმდა (ინსპექტირება, დოკუმენტური შემოწმება ნიმუშების კვლევა სხვადასხვა მაჩვენებლზე, მათ შორის აფლატოქსინზე) და არცერთი დარღვევა არ გამოვლინდა. 

სურსათის ეროვნული სააგენტო განაგრძობს რძის მწარმოებელი კომპანიების კონტროლს და ლაბორატორიულ კვლევას, რომლის შედეგებიც პერიოდულად ეცნობება საზოგადოებას.

სურსათის ეროვნული სააგენტო აფლატოქსინის შემცველობაზე რძეს, ევროკავშირის რეგულაციის შესაბამისად, 2022 წლიდან იკვლევს“, - ნათქვამია ინფორმაციაში, რომელსაც უწყება ავრცელებს.

3 აპრილს სეს- ი იუწყებოდა, რომ „სოფლის ნობათის“ რძის ნიმუშებში აფლატოქსინი გამოვლინდა და მოუწოდა მომხმარებლებს, არ გამოიყენონ აღნიშნული პროდუქტი.