ოკუპირებულ აფხაზეთში გამოცხადებული კარანტინის გამო ბევრი მოსწავლე შინ სწავლების მეთოდზე გადავიდა, მათი ნაწილი კი YouTube-ზე საგანმანათლებლო არხებს აქტიურად იყენებს.

რამდენიმე თვეა, რაც მათემატიკის მასწავლებელმა და პროგრამისტმა ლაშა ყალიჩავამ გადაწყვიტა შეექმნა სპეციალური ვიდეო არხი „მათემატიკა სკოლის მოსწავლეებისთვის“, სადაც ის ბავშვებისა და მათი მშობლებისთვის მარტივი მეთოდებით გაკვეთილებს ატარებს. კარანტინის შემოღების შემდეგ, არხის გამომწერთა რიცხვმა საგრძნობლად მოიმატა.

ამ სახით ონლაინ გაკვეთილების გავრცელების იდეა ლაშა ყალიჩავას მას შემდეგ გაუჩნდა, რაც მან საკუთარი მე-3, მე-4 და მე-6 კლასელი შვილებისთვის საჭირო მასალა ინტერნეტში ვერ მოიძია. YouTube არხზე ის ბავშვებისთვის ხელმისაწვდომ და მარტივ ენაზე მომზადებულ ვიდეო-გაკვეთილებს ტვირთავს, მათ შორის, დაბალი საფეხურის მოსწავლეებისთვისაც. პედაგოგის თქმით, მისი გაკვეთილები ასევე სასარგებლოა იმ მშობლებისთვის, რომლებიც ბავშვებს დავალებების შესრულებაში ეხმარებიან.

”ჩემს გაკვეთილებში ვცდილობ მარტივი ენა გამოვიყენო, მინიმუმამდე დავიყვანე სპეციალური ტერმინებიც. ვიდეო გაკვეთილებისთვის საჭირო თემებს,  ყოველდღიურობიდან - ჩემი შვილების მაგალითზე ვარჩევ. ამა თუ იმ მასალის ახსნისას ვხედავ, თუ რა უჭირთ მათ და ვხვდები, რომ მსგავს სირთულეებს სხვა ბავშვებიც აწყდებიან”,- აღნიშნა მან.

მათემატიკოსი ამბობს, რომ ახალი კონტენტის შესაქმნელად მოტივაციას მადლიერი გამომწერები უქმნიან, რომლებიც წერენ, რომ მისი ვიდეო-გაკვეთილები მათ სხვადასხვა თემის ათვისებაში ეხმარება. ახლა ონლაინ არხზე „მათემატიკა სკოლის მოსწავლეებისთვის“ დაახლოებით 50 გაკვეთილია განთავსებული, მესამედან მეშვიდე კლასის მოსწავლეებისთვის. ლაშა ყალიჩავა ამბობს, რომ არხზე მასალები მუდმივად ახლდება.

სოხუმმა კორონავირუსის გამო 28 მარტს დაწესებული შეზღუდვები 20 აპრილიდან ნაწილობრივ მოხსნა, თუმცა 4 მაისამდე შეჩერებულია სააღმზრდელო და სასწავლო პროცესი ბაღებში, სკოლებსა და უმაღლეს სასწავლებლებში.

წყარო: ნუჟნაია გაზეტა