აფხაზური ტელეგრამის არხები, ასლან ბჟანიას ე.წ. „ადმინისტრაციის“ წყაროზე დაყრდნობით, კვლავ ამტკიცებენ, რომ მზადდება რუსეთის მოქალაქეობის ჩამორთმევის კანდიდატთა სია, რომელშიც არასამთავრობო ორგანიზაციების წარმომადგენლები შედიან.

უფრო ადრე, აფხაზეთის დე ფაქტო რესპუბლიკის ეწ. პრეზიდენტის ადმინისტრაციამ ბრალდება უარყო და განაცხადა, რომ „ასეთი ცნობები არანაირად არ შეესაბამება სიმართლეს და ქვეყანაში სიტუაციის დესტაბილიზაციას ემსახურება":

„აფხაზეთის ხელმძღვანელობასა და სამთავრობო ორგანოებს არ აქვთ უფლებამოსილება, სხვა სახელმწიფოების მოქალაქეობის ჩამორთმევის საკითხი გადაწყვიტონ“ - წერია ბჟანიას „ადმინისტრაციის“ განცხადებაში.

„არავის უთქვამს, რომ რუსეთის მოქალაქეობის ჩამორთმევის უფლებამოსილება აქვს აფხაზეთის პრეზიდენტის ადმინისტრაციას ან ასლან ბჟანიას. ისევე, როგორც რეპრესიების დროს, ჩვენს გულმოდგინე ინფორმატორებს არ ჰქონდათ უფლება გაეგზავნათ ისინი ციმბირში ან სასიკვდილოდ. მათ მხოლოდ ინფორმაცია მიაწოდეს საჭირო ხალხს... და სისტემა კი თავად იზამს გასაკეთებელს. ტელეგრამ არხის „Respublica“ რედაქტორები არასოდეს აქვეყნებენ ინფორმაციას კონკრეტული წყაროს მითითების გარეშე. ამ შემთხვევაში საუბარია პრეზიდენტის ადმინისტრაციის წყაროზე“, - წერს „Respublica“ საპასუხოდ.

ინფორმაციისთვის: 2023 წლის ნოემბერში ოკუპირებული აფხაზეთის „საგარეო საქმეთა მინისტრმა“ ინალ არძინბამ დე ფაქტო რესპუბლიკაში საერთაშორისო არაკომერციული ორგანიზაციების საქმიანობაზე კონტროლის გამკაცრება დააანონსა. ის ემხრობა არასამთავრობო ორგანიზაციების საქმიანობის მარეგულირებელი კანონის შემუშავებისა და მიღების იდეას.

2023 წლის 20 ნოემბერს ასლან ბჟანიამ, არძინბას „უწყების“ წინადადებით, ხელი მოაწერა განკარგულებას აფხაზეთში საერთაშორისო არასამთავრობო ორგანიზაციების საქმიანობის რეგულირების შესახებ. დოკუმენტი არასამთავრობო ორგანიზაციებს ავალდებულებს, დე ფაქტო საგარეო უწყებას აცნობონ ყველა დაგეგმილი აქტივობა ასევე ის, თუ რომელი აფხაზური ორგანიზაციების ჩართვა იგეგმება ამ პროექტებში და როგორია მათი დაფინანსება.

8 დეკემბერს, „საგარეომ“ განცხადება გაავრცელა, რომლის თანახმადაც აფხაზეთში USAID - ის მიერ დაფინანსებული პროექტები იკრძალება, ხოლო სამხრეთ კავკასიაში USAID-ის მისიის ხელმძღვანელი ჯონ პენელი, პერსონა ნონ გრატად ცხადდება. აქვე ვკითხულობთ, რომ იკრძალება პროექტები, რომელთა მიზანია "აფხაზეთისა და საქართველოს მოქალაქეებს შორის კონტაქტების დამყარება", ასევე, იმ მედიაპროექტების დაფინანსება, რომელთა მიზანია "აფხაზეთის საშინაო და საგარეო პოლიტიკის გაშუქება".