1991 წლის 9 აპრილს,12 საათსა და 30 წუთზე, უზენაესი საბჭოს რიგგარეშე სხდომაზე საქართველოს სახელმწიფოებრივი დამოუკიდებლობის აღდგენის აქტი მიიღეს. რესპუბლიკის უზენაესი საბჭოსა და მთავრობის წევრებმა პატივი მიაგეს 9 აპრილის ტრაგედიის მსხვერპლების ხსოვნას და სხდომის დღის წესრიგში დააყენეს ერთადერთი, ქვეყნის სუვერენიტეტის საკითხი.

"სიმბოლურია, საქართველოს დამოუკიდებლობის აღდგენის გამოცხადება 9 აპრილს, ვინაიდან ამ დღეს გადაწყდა საქართველოს ბედი. 9 აპრილის წამებულთა სულები დაგვცქერიან ჩვენ და ხარობენ ზეციურ ნათელში, რამეთუ აღსრულდა ნება მათი, აღსრულდა ნება ქართველი ერისა. გაუმარჯოს დამოუკიდებელ საქართველოს!", - თქვა ზვიად გამსახურდიამ. 

დოკუმენტის მიღებას წინ უსწრებდა 1991 წლის 31 მარტის რეფერენდუმი. შეკითხვას, "ხართ თუ არა თანახმა აღდგეს საქართველოს სახელმწიფოებრივი დამოუკიდებლობა 1918 წლის 26 მაისის აქტის საფუძველზე?" ქვეყნის მოსახლეობის 98%-მა დადებითად უპასუხა.

1989 წლის 9 აპრილს, გამთენიისას საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან მშვიდობიანი საპროტესტო აქცია დაარბიეს, რასაც ადამიანთა მსხვერპლი მოჰყვა. დარბევის შედეგად 21 ადამიანი დაიღუპა, ხოლო ასობით მოქალაქე დაუდგენელი შემადგენლობის გაზით მოიწამლა.