ეროვნულმა სატყეო სააგენტომ, ზაფხულში ტყის ხანძრების შემთხვევების ზრდასთან დაკავშირებით, ხანძარსაწინააღმდეგო პრევენციული კამპანია "ნუ დატოვებ კოცონს უყურადღებოდ" წამოიწყო.

მათივე ინფორმაციით, სტატისტიკის მიხედვით, ტყეში ხანძრის გამომწვევი ძირითადი მიზეზი ადამიანთა დაუდევრობაა, რამაც შესაძლოა სავალალო შედეგები გამოიწვიოს.

"ტყეში კოცონის დანთება აკრძალულია ხეების ვარჯის ქვეშ, წიწვიან მოზარდ ტყეში, ძველ ნახანძრალში, ტყის დაზიანებულ უბნებში, ტორფიან და გამხმარბალახიან ადგილებში. ტყეში კოცონის დანთება დასაშვებია სპეციალურად მოწყობილ ბაქანზე, რომელიც 1,5 მ რადიუსში გაწმენდილია ადვილად აალებადი მასალებისგან (ხმელი ბალახი, ფიჩხი, ფოთლები). ტყის დანარჩენ ტერიტორიაზე კოცონის დანთება დასაშვებია ცეცხლის დასანთები ადგილის (ბაქანი) წინასწარი მოწყობის შემთხვევებში. ბაქნის წინასწარი მოწყობა გულისხმობს ცეცხლის კერიდან 1,5 მ რადიუსში ადვილად აალებადი მასალებისაგან (თივა, ხმელი ბალახი, ფოთლები, ფიჩხი) გაწმენდას", - აცხადებს უწყება.

სააგენტოში განმარტავენ, რომ ტყეებში სახანძრო უსაფრთხოების მოთხოვნათა დარღვევა, რასაც მოჰყვა ტყეში ხანძრის გაჩენა ან მისი გავრცელება გარკვეულ ფართობზე, აგრეთვე, ტყის მოსპობა ან დაზიანება ცეცხლის წაკიდების ან ცეცხლისადმი დაუდევრად მოპყრობის შედეგად - გამოიწვევს დაჯარიმებას 300 - დან 500- ლარამდე. ტყეში დაუდევრობით გამოწვეული ხანძრის შემთხვევაში კი, კანონი ითვალისწინებს თავისუფლების აღკვეთას ოთხიდან რვა წლამდე.

ეროვნული სატყეო სააგენტო მოუწოდებს მოსახლეობას, დაიცვან ტყეში უსაფრთხოების წესები და დაემორჩილონ იმ აკრძალვებს, რომელიც ტერიტორიაზე საპიკნიკე ადგილების მოწყობისას და კოცონის დანთებისას ვრცელდება.