საქართველოში ევროკავშირის წარმომადგენლობის განცხადებით, 35 მუნიციპალიტეტის ახალი საგრანტო შეთავაზება შეჩერებულია.

საელჩოს ვებ გვერდზე გამოქვეყნებული ინფორმაციით, საუბარია "შემოქმედებითი კომპასი საქართველოს" (CCG) 4-წლიანი პროექტზე, რომელიც ევროკავშირმა დააფინანსა და საქართველოს გოეთეს ინსტიტუტის თანადაფინანსებით ხორციელდება.

გადაწყვეტილების მიღების მიზეზად ისინი საქართველოში არსებულ პოლიტიკურ ვითარებას ასახელებენ, თუმცა აღნიშნავენ, რომ "შემოქმედებითი კომპასი საქართველო" გააგრძელებს საქმიანობას საქართველოს რეგიონებში შემოქმედებითი და კულტურის სექტორის მდგრადი მხარდაჭერისთვის.

"პროექტის ფარგლებში 35 მუნიციპალიტეტს გადაეცა გრანტი (თითოეულს 5000 ევროს ოდენობით) შემოქმედებითი სივრცეების ან მომავალში შემოქმედებითი დანიშნულებით გამოყენების პოტენციალის მქონე სივრცეების გამოვლენის, ფიზიკური აღნუსხვისა და ფოტოდოკუმენტირებისთვის. ასეთი სივრცეების აღნუსხვა 2024 წლის აპრილიდან - ივნისამდე პერიოდში განხორციელდა. ფიზიკური აღნუსხვის შემდეგ, მასში მონაწილე მუნიციპალიტეტებს შესაძლებლობა ექნებოდათ მონაწილეობა მიეღოთ შემოქმედებითი რესურსების შესწავლისთვის განკუთვნილ საგრანტო კონკურსში. საქართველოში არსებული პოლიტიკური ვითარებისა და ევროკავშირის დახმარებაზე მისი ზემოქმედების შესახებ ევროპული საბჭოს მიერ 2024 წლის 24 ივნისს გამოქვეყნებული დასკვნების გათვალისწინებით, ამ პროექტის ფარგლებში, საქართველოს მუნიციპალიტეტისთვის ახალი საგრანტო შესაძლებლობის შეთავაზება ამ ეტაპზე შეჩერებულია", - აღნიშნულია ინფორმაციაში.

რადიო "ათინათი" დაინტერესდა არის თუ არა ზუგდიდის მერია იმ მუნიციპალიტეტების ჩამონათვალში, რომლებსაც აღნიშნული პროექტის ფარგლებში დაფინანსება შეუჩერდათ. პრესსამსახურში განგვიმარტეს, რომ მიმდინარე გრანტი არ გაჩერებულა, თუმცა უცნობია ახალი საგრანტო შეთავაზება მიიღო თუ არა ადგილობრივმა მერიამ.

ინფორმაციისთვის, "შემოქმედებითი კომპასი" საქართველოს რეგიონებში კულტურის და შემოქმედებითი ინდუსტრიების გაძლიერებას ემსახურება. მისი მთავარი მიზანი კი საქართველოს რეგიონულ, განსაკუთრებით კი, ინდუსტრიულ და პოსტინდუსტრიულ ქალაქებში შემოქმედებითი ინდუსტრიების მდგრადი განვითარების ხელშეწყობაა. ამ მიზნის მისაღწევად, პროექტი სხვადასხვა მიმართულებით მუშაობს, იქნება ეს მუნიციპალიტეტების შემოქმედებითი შესაძლებლობებისა და რესურსების წარმოჩენა და გაძლიერება, თანამშრომლობის გაღრმავება, თუ დაფინანსების საშუალებების შექმნა.

თავდაპირველად, მუნიციპალიტეტებისთვის დაფინანსების შეზღუდვის შესახებ ინფორმაცია წალენჯიხის მერმა გია ხარჩილავამ გაავრცელა. მან ბრიფინგზე განაცხადა, რომ ინფრასტრუქტურული პროექტებისთვის მიღებული გრანტი მუნიციპალიტეტს მას შემდეგ გაუუქმდა, რაც საქართველოს ხელისუფლებამ "უცხოური გავლენის გამჭვირვალობის შესახებ" კანონი მიიღო.