საბჭოთა რუსეთის მიერ საქართველოს ოკუპაციიდან 104 წელი გავიდა. 1921 წლის 25 თებერვალს თბილისში რუსეთის წითელი არმია შემოვიდა და საქართველოს საყოველთაო და თავისუფალი არჩევნების გზით არჩეული ხელისუფლება დაამხო.

104 წლის წინ, ქვეყნის ოკუპაციას წინ უძღოდა ხუთკვირიანი სამხედრო ოპერაცია, გმირული და თავგანწირული ბრძოლა საქართველოს გადასარჩენად. ხოლო საბჭოთა ანექსიის დროს დაიწყო სასტიკი რეპრესიები, პოლიტიკური პარტიების აკრძალვა, ათასობით ადამიანის დახვრეტა, გადასახლება და დაპატიმრება.

დღეს, ოკუპაციის მსხვერპლთა პატივსაცემად, საქართველოს სახელმწიფო დროშები დაშვებულია პარლამენტის, მთავრობისა და სხვა ადმინისტრაციული დაწესებულებების, ასევე,  საზღვარგარეთ საქართველოს დიპლომატიური წარმომადგენლობების და საკონსულო დაწესებულებების შენობებზე.

25 თებერვალი საბჭოთა ოკუპაციის დღედ საქართველოს პარლამენტის დადგენილებით გამოცხადდა.