აფხაზეთის დე ფაქტო რესპუბლიკის ე.წ. პრეზიდენტმა ბადრა გუნბამ რუსულ გამოცემა TASS-ს განუცხადა, რომ სოხუმის არ აპირებს თბილისთან „რესპუბლიკის სტატუსის“ საკითხზე მოლაპარაკებას და მისი „დამოუკიდებლობის“ განხილვას, წერს „აფსნიპრესი“.

„კიდევ ერთხელ ვადასტურებ, რომ საქართველო, რა თქმა უნდა, უნდა შეეგუოს იმ ფაქტს, რომ აფხაზეთმა აღადგინა დამოუკიდებლობა და ამ გაგებით, ჩვენ არ გვაქვს ჩვენი რესპუბლიკის სტატუსის საკითხზე მოლაპარაკების გეგმები. ისინი ამას უნდა შეეგუონ“, - თქვა მან.

ამასთან, გუნბამ ხაზგასმით აღნიშნა, რომ „აფხაზეთი მშვიდობიან თანაარსებობას ცდილობს ყველა მეზობელ ქვეყანასთან, მათ შორის საქართველოსთან“.

მისი თქმით, „ეს ძალიან რთული გზაა, მაგრამ გაგება უნდა მოვიდეს“ და რომ ისინი, არ აპირებენ დაგეგმილი გზიდან გადახვევას.

საქართველოს აფხაზეთისა და ცხინვალის რეგიონები რუსეთმა 2008 წლის აგვისტოს ომის შემდეგ დამოუკიდებელ ქვეყნებად აღიარა, იმავე წლის სექტემბერში ნიკარაგუამ ცნო აფხაზეთის დამოუკიდებლობა, 2009 კი ვენესუელამ და ნაურუმ, ხოლო 2018 წელს - სირიამ.