ევროინტეგრაციის მომხრე უკრაინელები დღეს კიევში სამთავრობო შენობის პიკეტირებას აპირებენ. როგორც ადგილობრივი მედია იტყობინება, ოპოზიცია კიევში, "ევროპის მოედანზე" აპირებს ჩამოაყალიბოს კოლონა, რომელიც უკრაინის მინისტრთა კაბინეტის შენობის ბლოკირებას მოახდენს. კიევის ცენტრში საპროტესტო აქცია გრძელდება. სხვადასხვა წყაროების მიხედვით, წუხელ კიევის ცენტრში, მაიდანზე, 30 ათასიდან 100 ათას ადამიანამდე იყო შეკრებილი. გუშინ კიეველი სამართალდამცავები შეეცადნენ ცენტრალური ქუჩები მომიტინგეებისაგან გაეთავისუფლებინათ, რასაც სამართალდამცავებსა და აქციის მონაწილეებს შორის ჩხუბი მოჰყვა. აქციის მონაწილეებმა მილიციელებს ქვებიც დაუშინეს. წუხელვე უკრაინის დედაქალაქში საპროტესტო აქციის მონაწილეებმა "ევროპის მოედანზე" კარვები გაშალეს. მანამდე კი მომიტინგეებმა მთავრობის სახლის შტურმით აღება სცადეს, რა დროსაც აქციის მონაწილეთან წინააღმდეგ სამართალდამცველებმა ცრემლსადენი გაზი გამოიყენეს. როგორც უკრაინის შინაგან საქმეთა სამინისტოს პრესსამსახურში აცხადებენ, ოპოზიციას მშვიდობიანი აქციის ჩატარებაზე 25 ნოემბრისთვის შესაბამისი განაცხადი არ შეუტანია.