უკრაინის პრეზიდენტის, ვიქტორ იანუკოვიჩის ადმინისტრაციის ხელმძღვანელი სერგეი ლევოჩკინი თანამდებობიდან გადადგა. ამის შესახებ სააგენტო "ინტერფაქს უკრაინა" იუწყება. ამასთან, სააგენტო წერს, რომ ინფორმაცია ოფიციალურად დადასტურებული არ არის. "ინტერფაქს უკრაინას" წყაროს ცნობით, სავარაუდოდ გადაწყვეტილება ლევოჩკინმა კიევში, ევრომაიდანზე "ბერკუტის" მიერ ევროინტეგრაციის მომხრეთა აქციის დარბევის გამო მიიღო. დამოუკიდებლობის მოედანზე სპეცდანიშნულების რაზმმა მომიტინეები წუხელ, გვიან ღამით რეზინის ხელკეტების გამოყენებით დაარბია. დაშავებულია 40-მდე ადამიანი, 30-ზე მეტი კი მილიციამ დააკავა. ბოლო ინფორმაციით, დაკავებულთა ნაწილმა მილიციის შენობები დატოვა.