საერთაშორისო ორგანიზაცია Freedom House-ის პრესის თავისუფლების 2014 წლის რეიტინგში საქართველოს მდგომარეობა 3 პუნქტით გაუმჯობესდა და 197 ქვეყანას შორის 93-ე ადგილი დაიკავა. ამასთან, პოზიციის გაუმჯობესების მიუხედავად, საქართველო მედიის თვალსაზრისით, კვლავ ნაწილობრივ თავისუფალ ქვეყნებს შორის მოხვდა და მისი თავისუფლება 47 ქულით შეფასდა, რაც შარშანდელთან შედარებით, 2 ქულით გაუმჯობესებულია (49 ქულა). როგორც Freedom House-ის ანგარიშშია აღნიშნული, რეგიონში ყველაზე პოზიტიური ცვლილებები, პრესის თავისუფლების მხრივ საქართველოსა და ყირგიზეთში განხორციელდა. "მცირედი გაუმჯობესება შეინიშნებოდა საქართველოში, რომლის რეიტინგიც 49 ქულიდან 47 ქულით შეიცვალა კანონმდებლობაში must carry/must offer-ის მუდმივი ვალდებულების გაჩენის გამო, რომლის თანახმად საკაბელო კომპანიები ვალდებულები გახდნენ ყველა სატელევიზიო მაუწყებელს მოემსახურონ. ასევე საარჩევნო წლის განმავლობაში ნაკლებად აღინიშნებოდა ჟურნალისტების დაშინებისა და მათ წინააღმდეგ ძალადობის გამომხატველი ინციდენტები", - ნათქვამია Freedom House-ის ანგარიშში. Freedom House-ის პრესის თავისუფლების კვლევას 197 ქვეყანაში ატარებს. ორგანიზაცია პრესის თავისუფლებას სამართლებრივი, ეკონომიკური და პოლიტიკური მიმართულებით აფასებს. შეფასება 100-ქულიანი სისტემით ხდება. თავისუფალ ქვეყნებად ითვლებიან ის ქვეყნები, რომლებიც 0-დან 30 ქულამდე დააგროვებენ, 31-დან 60 ქულამდე – ნაწილობრივ თავისუფალ ქვეყნებად, 61-დან 100-მდე კი არათავისუფლად. ამასთან, 2014 წლის პრესის თავისუფლების რეიტინგში ყველაზე თავისუფალ ქვეყნებად ნიდერლანდები, ნორვეგია, შვედეთი, ბელგია და ფინეთი დასახელდნენ, პრესის თავისუფლების მხრივ კი ყველაზე ცუდი მდგომარეობა ბელორუსში, ერითრეაში, თურქმენეთში, უზბეკეთსა და ჩრდილოეთ კორეაშია.