დღეს, 16 აპრილს, 2 თვის წინ გაურკვეველ ვითარებაში გარდაცვლილი, 30 წლის ცეზარ შონიას ოჯახის წევრები და ახლობლები სამეგრელო-ზემო სვანეთის საოლქო პროკურატურასთან შეიკრიბნენ. გარდაცვლილის ოჯახის წევრებს ცეზარ შონიას თვითმკვლელობის ვერსიის არ სჯერათ, ამიტომ მათ პროკურატურას საქმის ხელახალი გამოიების თხოვნით მიმართეს. გარდაცვლილის ოჯახის წევრები ოლქის პროკურორის მოადგილემ ფელიქს ჯალაღონიამ მიიღო, რომელიც მათ თითქმის ორი საათის განმავლობაში ესაუბრებოდა.გარდაცვლილის ახლობლების თქმით, პროკურორი მათ საქმის ობიექტურ გამოძიებას დაჰპირდა. ცეზარ შონიას დედის განმარტებით, მისი შვილი სიმამრის სახლში ცოლის სანახავად წავიდა, თუმცა, მოგვიანებით ის საკუთარი სახლის წინ თოკით ხეზე ჩამომხრჩვალი იპოვეს. ცეზარ შონიას დედის თქმით, გარდაცვლილის მეუღლე უარყოფს იმ ფაქტს, რომ იმ საღამოს, მისი შვილი სიმამრის სახლში ცოლის სანახავად მივიდა. "აშკარად ეტყობოდა ძალადობის ნიშნები. ახლა ექსპერტიზის დასკვნა მოვიდა,სადაც ნათქვამია, რომ სხეულზე აღინიშნება ბლაგვი საგნით მიყენებული დაზიანებები და სისხლჩაქცევები, თუმცა,ამავე დასკვნაში წერია, რომ გარდაცვალება ჩამოხრჩობის შედეგად დადგა. გვაინტერესებს, რა მოუვიდა ჩემს შვილს და ვინ სცემა იგი გარდაცვალებამდე“, - ამბობს გარდაცვლილის დედა.