აფხაზეთის ლეგიტიმური მთავრობის სამეგრელო -ზემო სვანეთის წარმომადგენლობის ოფისთან დევნილთა საინიციატივო ჯგუფმა გამაფრთხილებელი აქცია გამართა. მათი მოთხოვნა აფხაზეთის მთავრობის წარმომადგენლობის მთლიანი და მათ შორის აფხაზეთის ლეგიტიმური მთავრობის თავმჯდომარის გიორგი ბარამიას გადაყენებაა. საინიციატივო ჯგუფი ახალი პროგრამითა და ხედვით კონკრეტულ სფეროში მუშაობის განახლების მოთხოვნით გამოდის. როგორც რადიო "ათინათთან" საუბარში დევნილთა საინიციატივო ჯგუფის წარმომადგენელმა თეონა ქარდავამ განაცხადა, აფხაზეთის ლეგიტიმური მთავრობის თავმჯდომარე გიორგი ბარამია უნდა გათავისუფლდეს დაკავებული თანამდებობიდან, წინააღმდეგ შემთხვევაში ისინი ზუგდიდში საპროტესტო აქციების გამართვას, კარვის გაშლას და შიმშილობის დაწყებას აპირებენ. აფხაზეთის მთავრობის წარმომადგენელობაში პრესასთან და საზოგადოებასთან ურთიერთობის სამსახურის უფროსმა  მორის შოგირაძემ რადიო „ათინათთან“ საუბარში აღნიშნა, რომ აფხაზეთის მთავრობის წარმომადგენლობა მთელი ამ ხნის მანძილზე შეძლებისდაგვარად ცდილობდა დახმარება გაეწია მათთვის, მისი განცხადებით, დევნილთა საინიციატივო ჯგუფის ბრალდებები აბსურდულია.