ТОЧКИ СОПРИКОСНОВЕНИЯ
საგანგაშო ეპიდსიტუაცია აფხაზეთში და დეპუტატების ნაწილის უარი შეზღუდვების დაწესებაზე (ფოტო/აუდიო)
აფხაზეთის კოვიდკლინიკები გადავსებულია, ჯანდაცვის მინისტრი აცხადებს, რომ ეპიდემიოლოგიური სიტუაცია საგანგაშოა და მთავრობას შეზღუდვების გამკაცრებისკენ მოუწოდებს. ედუარდ ბუთბას მიმართვას აფხაზი დეპუტატების ნაწილი გამოეხმაურა და შესაბამისი დადგენილებაც მოამზადა, თუმცა კოლეგების უმრავლესობის მხარდაჭერა ვერ მიიღო.  აკრძალვების დაწესების ერთ-ერთი მოწინააღმდეგე, ომარ ჯინჯოლია, მიიჩნევს, რომ ამ საკითხს საკოორდინაციო საბჭო უნდა წყვეტდეს, რომელსაც პრემიერ-მინისტრი ალექსანდრე ანქვაბი ხელმძღვანელობს. "მინისტრის მიმართვას შტაბი განიხილავს...ჩვენ ვერ განვსაზღვრავთ, რა იქნება უკეთესი ან უარესი, ამიტომ, მოდით, ადამიანებს მუშაობის საშუალება მივცეთ, იქნებ მათ ისეთი რამე გააკეთონ, რომ ხვალიდან კოვიდი საერთოდ არ გვექნება", - ამბობს დეპუტატი.

საკითხის განხილვა პარლამენტში მწვავე კამათის ფონზე მიმდინარეობდა. დეპუტატი ვალერი აგრბა მიიჩნევს, რომ პარლამენტს ჯანდაცვის მინისტრის მოთხოვნის იგნორირების უფლება არ აქვს, რადგან ეპიდემიოლოგიური სიტუაცია აფხაზეთში დღითიდღე უარესდება. "ის, რომ ჯანდაცვის მინისტრი, რომელიც დაუღალავად მუშაობს და დილიდან საღამომდე დადის კოვიდ ზონებში, რომლის უფლებამოსილება და მოვალეობაცაა, იმოქმედოს ამ სიტუაციაში, მიმართავს პარლამენტს დახმარებისთვის, ნიშნავს იმას, რომ საკოორდინაციო შტაბი არ მუშაობს ისე, როგორც ეს 2020 წელს იყო, ჩვენ მაშინ მხოლოდ 4 ინფიცირებული გვყავდა და სიკვდილიანობა საერთოდ არ გვქონია, ახლა კი დღე-ღამეში 200-მდე ადამიანი ინფიცირდება და 5 მაინც კვდება და ჩვენ ამას უარვყოფთ და ვამბობთ, რომ ეს არ ეხება ეროვნულ უსაფრთხოებას", - განაცხადა აგრბამ.

მას მხარი დაუჭირა დეპუტატმა გარი კოკაიამ, რომლის მტკიცებით, ხელისუფლებას ტურისტული სეზონის დასაწყისშივე "გაექცა სიტუაცია ხელიდან", გარდა ამისა, მან სათანადოდ ვერ უზრუნველყო საზღვრის კონტროლი და მოსახლეობის დაცვა ვირუსის გავრცელებისგან, ვერ გათვალა რისკები, რაც ტურისტების შემოსვლას შეიძლება მოჰყოლოდა. "საკურორტო სეზონი დაწყებამდე უნდა დაგეწესებინათ შეზღუდვები, სანამ ჭიშკარს გახსნიდით. არაფერი გაქვთ საამაყო, გგონიათ, რომ პრეზიდენტს შეეხება ეს, მას იცავთ, თუმცა, ჩვენ ჩვენი ხალხის დაცვა გვინდა, სხვები სხვაგვარად ფიქრობდნენ, მაგრამ, მე ვთვლი, რომ ჩვენ არასაკმარისად ვრეაგირებთ ამ საკითხებზე და ჩვენ ჯანდაცვას არ აქვს მხარდაჭერა. ადამიანები ხელფასების გარეშე რჩებიან, ამასთან ერთად, სხვა ყველაფერი კარგად ფინანსდება. ჩვენი დაფინანსებაც არ ფერხდება რატომღაც, ექიმების დანამატი კი ყოველთვის იგვიანებს", - განაცხადა კოკაიამ .

შეხვედრაზე ვაქცინაციის პროცესზეც ისაუბრეს და აღნიშნეს, რომ ამ ეტაპზე გაურკვეველია, მიიღებს თუ არა რესპუბლიკა რუსული ანტიკოვიდურ პრეპარატ "სპუტნიკ V-ის" მორიგ პარტიას. ის 6.5 ათასი დოზა, რაც სოხუმმა მაისში მიიღო მოსკოვისგან, უკვე ამოიწურა. დეპუტატი ალხას ჯინჯოლია ამ სიტუაციაში გამოსავალს საერთაშორისო ორგანიზაციების დახმარებაში ხედავს. "არაოფიციალური მონაცემებით, დარწმუნებული ვარ, რასაც ვიტყვი, იმაზეც პრეტენზიებს გამოთქვამს ბევრი თქვენგანი, ჩვენ უარი გვითხრეს ვაქცინებით უზრუნველყოფაზე. მაშინ, რა დაგვრჩენია, ალბათ პრობლემის გადაჭრის ალტერნატიული გზების მოძიება უნდა დავიწყოთ, შეგვიძლია საერთაშორისო ორგანიზაციებს მივმართოთ და სანამ მათ ვუსაყვედურებდეთ, უნდა გავიხსენოთ, რომ შარშან მათ სადეზინფექციო მასალის დიდი მოცულობით მოგვამარაგეს, მაშინ ჩვენ მათ მადლობა გადავუხადეთ და ამ მარაგით, საკმაოდ დიდი ხნის განმავლობაში გავძელით. ვთვლი, რომ ეს შესაძლებელია ჩვენთვის და მე პირადად მივმართავ კოლეგებს საერთაშორისო ორგანიზაციებში დახმარებისთვის", - აღნიშნა დეპუტატმა.

სხვა პრობლემებთან ერთად, შეხვედრაზე ჯანდაცვის მინისტრმა ძვირადღირებული მედიკამენტების დეფიციტსაც გაუსვა ხაზი და აღნიშნა, რომ ხშირ შემთხვევაში ადამიანებს, საკუთარი ძალებით და სახსრებით უწევთ მათი მოპოვება, თუმცა, როდესაც პრეპარატები რესპუბლიკაში არის, ისინი უფასოდ გაიცემა. ედუარდ ბუთბას თქმით, ამ ეტაპზე, ისეთი მედიკამენტები, როგორიცაა არტემრა და არტლეგია, არ არის მისაწვდომი პაციენტებისთვის. "ეს პრეპარატები რუსეთის ფედერაციაშიც დეფიციტშია და მათი შოვნა არც ისე მარტივია, დღესდღეობით, რაღაც ნაწილის დაჯავშნა მოვახერხეთ, უკვე თანხაც გადავიხადეთ და ველოდებით მათ მოწოდებას", - ამბობს ბუთბა.

მწვავე დებატების მიუხედავად, პარლამენტმა შემდგომი შეზღუდვების შესახებ გადაწყვეტილება ჯერჯერობით ვერ მიიღო. ჯანდაცვის სამინისტრო კი დაჟინებით მოითხოვს მომდევნო ორი კვირის განმავლობაში შეზღუდვების მნიშვნელოვან გამკაცრებას.

პანდემიის დაწყებიდან დღემდე აფხაზეთის მასშტაბით Covid-19 სულ 21 061 ადამიანს დაუდასტურდა, გარდაცვლილია - 289, გამოჯანმრთელდა 16 763 მოქალაქე.



მასალა მომზადებულია გადაცემა "Точки соприкосновения" - ს მიხედვით, რომელიც გადის რადიო "ათინათის" ეთერში. პროექტი ხორციელდება აფხაზ პარტნიორებთან თანამშრომლობით. მასალა შესაძლოა შეიცავდეს ტერმინებს, რომლებსაც აფხაზეთის დე ფაქტო რესპუბლიკაში იყენებენ.


Print Email
FaceBook Twitter
რ ე კ ლ ა მ ა
ტერაბანკმა მცირე და საშუალო ბიზნესის დაფინანსებისთვის ევროპის საინვესტიციო ბანკისგან 6 მილიონი ევრო მიიღო. თანხა მთლიანად ამ სეგმენტის გაჯანსაღებასა და განვითარებას, COVID-19-ის პანდემიით გამოწვეული ზიანის შემცირებასა და სწრაფ რეაბილიტაციას მოხმარდება.
გიგა ოთხოზორიას დღეს 36 წელის შეუსრულდებოდა. სოფელ ხურჩაში ე.წ. აფხაზი მესაზღვრის მიერ მოკლული ოთხოზორიას საფლავი დღეს
ზუგდიდის მუნიციპალიტეტის მერის მოვალეობის შემსრულებელმა, კონსტანტინე კაკავამ მხარის გუბერნატორის პირველ მოადგილესთან, ნინო ვიბლიანთან ერთად 2021-2022 წლის მერის სტიპენდიანტებს სერთიფიკატები გადასცა.
კორონავირუსი
სამეგრელო-ზემო სვანეთის სამხარეო ადმინისტრაციის ინფორმაციით, გასული დღე-ღამის განმავლობაში რეგიონის მასშტაბით კორონავირუსით კიდევ ერთი ადამიანი გარდაიცვალა.
საქართველოში ბოლო 24 საათში გამოვლინდა ვირუსით ინფიცირების 5 219 ახალი დადასტურებული შემთხვევა, მათგან სამეგრელო - ზემო სვანეთში 339.
გასული დღე-ღამის განმავლობაში აფხაზეთში კორონავირუსზე ტესტირება 836 ადამიანს ჩაუტარდა და გამოვლინდა ინფიცირების 226 ახალი შემთხვევა.
საზოგადოება
გარემოს დაცვისა და სოფლის მეურნეობის სამინისტრომ ადრეულად გარდაცვლილი მეტყევის "სანდრო ურუშაძის პრემია 2021" ხობელ ბუნების დამცველს, სანდრო ნარსიას გადასცა.
საკოორდინაციო საბჭოს გადაწყვეტილებით, საბავშვო ბაღებსა და როგორც საჯარო, ისე კერძო სკოლებში, 4 ოქტომბერს სასწავლო პროცესი საკლასო ოთახებსა და აუდიტორიებში განახლდება,
ქართველმა მოჭადრაკემ, ნონა გაფრინდაშვილმა Netflix-ის უჩივლა, – ამის შესახებ ინფორმაციას „ნიუ იორკ თაიმსი“ ავრცელებს.
დღის სიახლეები
21 / ოქტომბერი 2021
კონსტიტუციური უსაფრთხოების დეპარტამენტის სამეგრელო -ზემო სვანეთის რეგიონალური მთავარი სამმართველოს უფროსი, რუსლან შამახიას ინფორმაციით,
21 / ოქტომბერი 2021
ზუგდიდის პოლიციის სამმართველოს შენობასთან ძალოვანი სტრუქტურების ყოფილი თანამშრომლები შეიკრიბნენ და განცხადება გააკეთეს.
21 / ოქტომბერი 2021
ტერაბანკმა მცირე და საშუალო ბიზნესის დაფინანსებისთვის ევროპის საინვესტიციო ბანკისგან 6 მილიონი ევრო მიიღო. თანხა მთლიანად ამ სეგმენტის გაჯანსაღებასა და განვითარებას, COVID-19-ის პანდემიით გამოწვეული ზიანის შემცირებასა და სწრაფ რეაბილიტაციას მოხმარდება.
გემრიელი ისტორიები
მთავარი საინფორმაციო გამოშვება
ჩვენი თვითმმართველობა
არქივი
ამინდი
ზუგდიდი 17 °C
img
სოხუმი 17 °C
img
ფოთი 11 °C
img
მესტია 10 °C
img
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.