ზუგდიდის მერიის მუნიციპალური სერვისების მართვის სამსახურის ყოფილი უფროსის თენგიზ ქობალიას მიმართ სოლიდარობის გამოსახატად სოციალურ ქსელში მისმა მეგობარმა ლევან ბეჭვაიამ პოსტი გამოაქვეყნა. ის ქობალიას მეგობრებს, კოლეგებსა და სხვა ზუგდიდელებს მხარდაჭერისკენ მოუწოდებს. ბეჭვაიამ რადიო „ათინათს“ უთხრა, რომ პოსტს სოციალურ ქსელში უამრავი გამოხმაურება აქვს. მისივე თქმით, მიმართვას იურიდიულ ფორმას ადვოკატი მისცემს და სასამართლოზე წარადგენს.

„ჩვენ მივმართავთ სასამართლოს თხოვნით, რომ გაითვალისწინონ მისი პიროვნული თვისებები, მისი ღირსებები. არ შეიძლება, თენგოსნაირი ადამიანი ასეთი აბსურდული ბრალდებით იჯდეს ციხეში. ეს არის ადამიანური თანადგომა და ჩვენი მკაცრი პოზიცია. გამოხმაურებებით თუ ვიმსჯელებთ, ძალიან ბევრი ადამიანი დაუდგება თავდებში მას და იმედი გვაქვს, რომ სიმართლე გაიმარჯვებს“, - გვითხრა ბეჭვაიამ.

რადიო „ათინათი“ მიმართვის ტექსტს უცვლელად გთავაზობთ:


სოლიდარობა თენგოს!!!

ზუგდიდელებო, მეგობრებო, თენგოს კოლეგებო, ნაცნობებო, ადამიანებო-ვისაც გჯერათ, გიყვართ და გულშემატკივრობთ თენგოს!

ჩვენი-თენგოს მეგობრების ინიციატივას, მიგვემართა სასამართლოსთვის და ჩავდგომოდით თავდებში პატიოსან და ღირსეულ ზუგდიდელს, იმდენად დიდი გამოხმაურება მოყვა, რომ ჩვენ,თენთოს მეგობრები მოგმართავთ,აქვე დააფიქსიროთ თქვენი მხარდაჭერა!

თენგო საუკეთესო პიროვნებაა,გამორჩეული თავისი ადამიანური თვისებებით.ღვთისნიერი,კეთილშობილი,სამართლიანი!საკუთარი ქალაქისა და ქვეყნისთვის თავდადებული!საიმედო ნებისმიერი ზუგდიდელისთვის!საქმის ერთგული და უღალატო მეგობარი!

იმ მოცემულობაში,რომელშიც აღმოჩნდა პროფესიონალი საჯარო მოხელე,შესაძლებელია ნებისმიერი მისი კოლეგა აღმოჩნდეს!სოლიდარობის გამოხატვით დაიცავით საკუთარი უფლებებიც!

ღირსეულ პიროვნებას შეუფერებელი ფორმით დაკავების დროსაც კი,რამაც გული ატკინა და გააოგნა მთელი ქალაქი ,ღირსეულად ეჭირა თავი!
დარწმუნებულები ვართ ,რომ ეს მდგომარეობა და გაუგებრობა გაირკვევა ძალიან მალე.იმედი გვაქვს გადაწყვეტილების მიმღები სტრუქტურების და დამოუკიდებელი სასამართლოსი!

ხალხის სიყვარული გადაწონის ყველანაირ უსამართლობას!", - არნიშნულია ტექსტში.

მომდევნო სასამართლო სხდომა ქობალიას საქმეზე თბილისში 4 თებერვალს გაიმართება.

თენგიზ ქობალია, რომელიც ბრალს არ აღიარებს, 24 დეკემბერს საკუთარ კაბინეტში დააკავეს. გამოძიება მას დანაშაულის შეუტყობინებლობას ედავება. სუს-ის განცხადებაში აღნიშნულია, რომ იგი ზუგდიდის მუნიციპალიტეტის მერის ლაშა გოგიას და ვიცე-მერის გია გულორდავას მიერ განსაკუთრებით მძიმე დანაშაულის ჩადენის ფაქტი შეიტყო და აღნიშნულის შესახებ სამართალდამცავ ორგანოებს არ აცნობა. ქობალიას წინასწარი პატიმრობა 25 დეკემბერს შეეფარდა.

ამავე თემაზე:

თენგიზ ქობალიასა და მასთან ერთად დაკავებულ პირს წინასწარი პატიმრობა შეეფარდა