საქართველოს პრეზიდენტი, სალომე ზურაბიშვილი, ოკუპირებულ აფხაზეთში მიმდინარე მოვლენებს გამოეხმაურა. მან განაცხადა, რომ გმობს რუსეთის „აჩქარებულ ნაბიჯებს აფხაზეთის ანექსიის მიმართულებით“.

„მინდა გამოვეხმაურო მოვლენებს, რაც მიმდინარეობს ოკუპირებულ აფხაზეთში და რუსულ პოლიტიკას. მინდა დაგვმო, რომ დღეს რუსეთი დგამს აჩქარებულ ნაბიჯებს ანექსიის მიმართულებით, როცა ითხოვს საქართველოსგან, დათანხმდეს დელიმიტაციაზე, რაც არის წარმოუდგენელი, და რაც პრინციპში, უგულებელყოფს მთელ ლოგიკას ამ მთავრობის „დათმომების“ – თითქოს, მათით შეიძლება რუსეთს შეაცვლევინო პოლიტიკა. ამით მხოლოდ ააჩქარებინებ“, – უთხრა პრეზიდენტმა ჟურნალისტებს.

სალომე ზურაბიშვილმა ასევე სოლიდარობა გამოხატა აფხაზეთის სამოქალაქო საზოგადოების მიმართ, რომელიც სოხუმსა და მოსკოვს შორის საინვესტიციო ხელშეკრულების რატიფიცირებას ეწინააღმდეგებიან.

მანამდე, აფხაზეთის უმაღლესი საბჭოს თავმჯდომარე ჯემალ გამახარიამ განაცხადა, რომ ყველა შეთანხმება, კანონი, რასაც რუსეთის ზეწოლით იღებს აფხაზეთის დე-ფაქტო ხელისუფლება, მიმართულია ანექსიისკენ.

15 ნოემბერს, აფხაზეთის დე ფაქტო რესპუბლიკის ე.წ. პარლამენტში ჩაიშალა რუსეთთან საინვესტიციო შეთანხმების კანონპროექტის რატიფიცირების საკითხი.

კანონპროექტის მოწინააღმდეგეები თავდაპირველად, საკითხის დღის წესრიგიდან მოხსნას ითხოვდნენ, უფრო გვიან კი მთავარი მოთხოვნა გააჟღერეს - „პრეზიდენტის უპირობო გადადგომა“.

აფხაზმა ლიდერმა ასლან ბჟანიამ განაცხადა, რომ კანონპროექტს უკან გაიწვევს, თუმცა გადადგომას არ აპირებს.