2025 წლის 3 იანვარს, უწყვეტი პროტესტის მონაწილეები 37 - ედ შეიკრიბნენ ზუგდიდში. სხვადასხვა თაობის ადამიანები სახელმწიფო რწმუნებულის ადმინისტრაციის მიმდებარე ტერიტორიაზე მივიდნენ.
მათი მოთხოვნები უცვლელი რჩება, რეჟიმის პატიმრების გათავისუფლება და ხელახალი არჩევნები.


ტრადიციულად, შეკრებილებს სიტყვით მიმართავენ გამომსვლელები, რომლებიც მიმოიხილავენ მიმდინარე მოვლენებს, მათ შორის, შეკრებისა და მანიფესტაციის შემზღუდავ კანონებს, რომელთაც, მიხეილ ყაველაშვილმა ინაუგურაციის დღესვე მოაწერა ხელი და უკვე ძალაშია შესული.

„დროას“ აქტივისტმა, მარიამ სიჭინავამ რადიო „ათინათს“ უთხრა, რომ ის უკვე მეორედ დააჯარიმეს 2000 ლარით, რადგან, ეხურა ე.წ. ბალაკლავა.

„მეკეთა ე.წ. ბალაკლავა, თუმცა, მათ ჩემი იდენტიფიცირება მარტივად შეუძლიათ, იმიტომ, რომ 37- ე დღეა ვდგავართ აქ და რისი თქმაც მინდა, ისაა, რომ ეს არ იქნება შემაფერხებელი არცერთი ადამიანისთვის, იმიტომ, რომ ჩვენ ერთხმად ვიძახით, რომ პრეზიდენტი არის ალაგეტიმური, მთავრობა არის არალეგიტიმური, შესაბამისად, არ ვაღიარებ მათ მიერ ხელმოწერილ კანონებს, და კი, გავაგრძელებ ბალაკლავას ტარებასაც , პიროტექნიკასაც გამოვიყენებ, არც სასამართლოში ვაპირებ მისვლას ...“, - თქვა მან.


აქციაზე მონაწილეებმა, ისევე, როგორც წინა დღეებში, საქართველოს და ევროკავშირის დროშები მიიტანეს, ასევე აქ არის პროევროპული შინაარსის ბანერები.

ცნობისთვის, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, საპროტესტო აქციები იმართება.