აფხაზეთის დე ფაქტო რესპუბლიკაში, ხვალიდან, 9 იანვრიდან, ელექტროენერგიის მიწოდებაზე ახალი შეზღუდვები ამოქმედდება. ინფორმაციას კომპანია „ჩერნომორენერგო“ ავრცელებს. ამავე ცნობით, გრაფიკის თანახმად, დენი დღე - ღამის განმსვლობაში, 6 საათით გაითიშება.

მათივე ცნობით, ამ ზომებს, რუსეთის ფედერაციიდან ელექტროენერგიის სოციალური ნაკადის დაზოგვის აუცილებლობის გამო მიმართეს.


ამასთან, ახალი წლის დღესასწაულებთან დაკავშირებით, 2024 წლის 31 დეკემბერსა და 2025 წლის 1 იანვარს, აფხაზეთის დე ფაქტო რესპუბლიკის ტერიტორიაზე, ელექტროენერგია მოსახლეობას უწყვეტად მიეწოდებოდა.

მანამდე,  ენერგოკომპანია იუწყებოდა, რომ სოხუმი ელექტროენერგიის მიწოდების ადრე მოქმედ, გათიშვების 4 საათიან გრაფიკს დაუბრუნდებოდა. 

ცნობისთვის, რუსეთმა ოკუპირებული აფხაზეთისთვის ელექტროენერგიის ჰუმანიტარული ნაკადის მიწოდება 23 დეკემბერს დაიწყო.

ნოემბრის დასაწყისში, მოსკოვმა სოხუმს უფასო ელექტროენერგიის მიწოდება შეუწყვიტა. 11 დეკემბრიდან მოსახლეობას დღისით არასრული სამ საათით მიეწოდებოდა დენი, ღამით კი 21:00 საათიდან 07:00 საათამდე.

აფხაზი ლიდერის ასლან ბჟანიას გადადგომის და ე.წ. პარლამენტის მიერ მოსკოვთან „საინვესტიციო ხელშეკრულების“ ჩაგდების შემდეგ, რუსეთმა სრულად შეუჩერა დე ფაქტო რესპუბლიკას დაფინანსება.

უკვე წლებია, სოხუმი ენერგოდეფიციტის აღმოფხვრას ვერ ახერხებს. ადგილობრივი ენერგოკომპანია ამის მიზეზად ელექტროქსელებზე გაზრდილ დატვირთვას და ინფრასტრუქტურის ცვეთას, სრული გამრიცხველიანების არარსებობას, ელექტროენერგიაზე დაბალ ტარიფებს, მოსახლეობის ნაწილის მიერ ელექტროენერგიის საფასურის გადაუხდელობას და კრიპტოვალუტის უკანონო მაინინგს ასახელებს.

ინფორმაციისთვის, ზამთრის თვეებში ენგურჰესი, ძირითადად, აფხაზური მხარის საჭიროებებს აკმაყოფილებდა. მხარეებს შორის არსებული შეთანხმება გამომუშავებული რესურსის 60/40-ზე პარიტეტით გადანაწილებას გულისხმობს.