მულტიმედია
გაცვლითი პროგრამები, როგორც წარმატების დასაწყისი - ზუგდიდელი ანი გაბელიას ევროპული განათლება (ფოტო/ვიდეო)
23 წლის ანი გაბელია შოთა მესხიას სახელობის უნივერსიტეტში ინგლისური ენის პროფესიულ მიმართულებაზე ლექციებს კითხულობს. ის 2020-2021 წლებში გაცვლითი პროგრამით პორტუგალიაში, „პორტოს საერთაშორისო უნივერსიტეტში“ სწავლობდა.
როგორც თვითონ ამბობს, გაცვლით პროგრამაში მონაწილეობა სპონტანურად მიიღო და აპლიკაციის შევსებისას არ ელოდა პროგრამაში გამარჯვებას.

„არ მეგონა, რომ საკმარისად კარგი ვიყავი ამ პროექტისთვის, მაგრამ ძალიან მოულოდნელი იყო ჩემთვის ის ოფიციალური მეილი, რომელიც ადასტურებდა, რომ ამ პროექტში გავიმარჯვე და რეალურად ეს იყო იმედი იმისა, რომ მომავალში შევძლებდი სხვა პროექტებში ჩართვასაც და მივიღებდი მონაწილეობას არამხოლოდ ადგილობრივ პროექტებში, არამედ საერთაშორისო პროგრამებში. ჩემი დიდი ხნის ოცნება იყო, სწავლა გამეგრძელებინა საზღვარგარეთ“, - ეუბნება ანი რადიო „ათინათს“.

ის საქართველოში ინგლისური ფილოლოგიის მიმართულებაზე სწავლობდა, ხოლო პორტუგალიაში სწავლა გააგრძელა ენების, ლიტერატურის და ჰუმანიტარულ მეცნიერებათა ფაკულტეტზე.

ანი გვეუბნება, რომ ამ პროცესში მთავარი დაბრკოლება მისი მცირე ასაკი და სხვა ქვეყანაში დამოუკიდებლად ცხოვრება იყო, თუმცა მისი თქმით, პორტოში ჩასვლისას მეგობრულმა ატმოსფერომ მარტო ცხოვრების შიში დააძლევინა და ადაპტაციაც არ გასჭირვებია.


როგორც ანი გვიზიარებს, უნივერსიტეტის საერთო საცხოვრებელში ის ერთადერთი უცხოელი იყო და ცდილობდა საკუთარი ქვეყნის კულტურა ადგილობრივებისთვისაც გაეცნო.

„დამხვდა ძალიან მეგობრული ატმოსფერო, ადამიანები სხვადასხვა ქვეყნიდან, სტუდენტები , რომლებიც ჩემსავით იყვნენ ჩასულები იმისთვის, რომ გაეზიარებინათ სხვა ქვეყნის კულტურა, ტრადიციები, ღირებულებები და მიეღოთ განათლება. ძალიან მნიშვნელოვანი ჩემთვის აღმოჩნდა ის, რომ ჩვენ გვქონდა შესაძლებლობა ერთმანეთისთვის გაგვეზიარებინა ჩვენივე გამოცდილება და ინფორმაცია ჩვენივე ქვეყნებზე. ვაწყობდით კულტურათაშორის ღონისძიებებს, საღამოებს, სადაც შემეძლო გამეკეთებინა ჩემი ქვეყნის პრეზენტაცია. ჩემი საუნივერსიტეტო ქალაქი კი ძალიან გამორჩეული იყო.ეს რეალურად ჩემთვის სიახლე იყო, რადგან ჩემი უნივერსიტეტის ფაკულტეტები განაწილებული იყო სრულიად მთელს ქალაქში. მქონდა იმის შესაძლებლობა, რომ არამხოლოდ ჩემს ფაკულტეტზე მესწავლა, არამედ მენახა სხვა ფაკულტეტები, ის სპეციალობები, რომლებიც ამ ფაკულტეტებზე ისწავლებოდა. დავუახლოვდი იმ სტუდენტებს, რომლებიც სრულიად სხვა საჭიროებებით იყვნენ ჩასული პორტუგალიაში", - განმარტავს ის.

ის ასევე ამბობს, რომ ქართველები და პორტუგალიელები გარკვეული თვალსაზრისით ჰგვანან ერთმანეთს და მაგალითად გვისახელებს სტუმართმოყვარეობის, ოჯახისა და მეგობრობის იდენტურ აღქმას.

რაც შეეხება სტუდენტური ცხოვრების ასპექტებს, რომელიც განასხვავებს ქართულ და პორტუგალიურ რეალობას, მისი თქმით, პორტოში ქალაქისა და უნივერსიტეტის მიერ შეთავაზებული სტუდენტური სერვისები გაცილებით მრავალფეროვანი იყო.

„ძალიან მნიშვნელოვანი და განსხვავებული აღმოჩნდა ჩემთვის ის სტუდენტური სერვისები, რომელსაც მთავაზობდა ქალაქი და უშუალოდ უნივერსიტეტი და ვფიქრობ, რომ ეს არის სწორედ ის მნიშვნელოვანი ფაქტორი, რითაც ზოგადად ევროკავშირი უსვამს ხაზს, რომ სტუდენტის სტატუსის ქონა არის ერთ-ერთი მთავარი პრიორიტეტი. ეს გამოიხატება იმით, რომ გაქვს ძალიან ბევრი სერვისი, როგორც მომსახურების სფეროში, ასევე კულტურის მიმართულებით“, - აღნიშნავს ანი.

დღეს, ის საკუთარ გამოცდილებას უკვე სხვებს უზიარებს, ეხმარება გაცვლითი პროგრამით დაინტერესებულ სტუდენტებს სააპლიკაციო ფორმის შევსებასა და გასაუბრებისთვის მომზადებაში.

„სტუდენტებისგან ძალიან ბევრი კითხვები არის ხოლმე უშუალოდ იმ პერიოდზე. ამან მიბიძგა, რომ მომავალში დავგეგმო საჯარო შეხვედრა ლექციის ფორმატში, სადაც ვისაუბრებ ევროკავშირის მიერ დაფინანსებულ ახალგაზრდულ პროექტებზე. ვაპირებ, რომ „ქეის სთადი“ შემოვიტანო თვითონ სააპლიკაციო ფორმა, რადგან ამაზე ძალიან ბევრი კითხვა არის ხოლმე. ვგეგმავ, რომ სწორედ სააპლიკაციო ფორმის შევსებაც ვასწავლო და გავუზიარო უფრო ვრცელ აუდიტორიას იმის შესახებ ინფორმაცია, თუ რა სახის შესაძლებლობები არსებობს დღესდღეობით".

ანი აღნიშნავს, რომ პორტუგალიაში გატარებულმა პერიოდმა გარდამტეხი როლი ითამაშა მის ცხოვრებაში და პრაქტიკაში ეფექტურად იყენებს ევროპულ განათლებას. ჩვენთან საუბრის ბოლოს კი, ახალგაზრდებს ურჩევს, გამოიყენონ შესაძლებლობა, რომელსაც გაცვლითი პროგრამები სთავაზობენ.

Print Email
FaceBook Twitter
დაფინანსებული
ევროპის რეკონსტრუქციის და განვითარების ბანკმა ზუგდიდის მერიასთან ერთად, ქალების ავტობუსის მძღოლებად მომზადების ახალი პროგრამა
დღეს "ზუგდიდის დამოუკიდებელი ცხოვრების ცენტრი"-ს ოფისში, პროექტის ,,ზუგდიდის მუნიციპალიტეტში შეზღუდული შესაძლებლობის მქონე პირთა თემის საჭიროებებზე მორგებული პროგრამების გაუმჯობესება" ფარგლებში, მეორე
დაბალი ფასის, გამძლეობისა და მარტივად დამონტაჟების გამო, პოლიეთილენის მილები ბაზარზე სულ უფრო პოპულარული ხდება და სხვა მასალებს ანაცვლებს.
ამავე კატეგორიაში
დღის სიახლეები
20 / მაისი 2024
ზუგდიდში “აგენტების” კანონის საწინააღმდეგო აქციის მონაწილეები კვლავ შეიკრიბნენ და ქალაქის მასშტაბით მსვლელობა მოაწყეს.
20 / მაისი 2024
ზუგდიდის მუნიციპალიტეტის მასშტაბით 51 სკოლიდან პირველკლასელთა ლიმიტი პირველ, მეორე, მესამე და მეოთხე საჯარო სკოლაში სრულად შეივსო.
20 / მაისი 2024
23 წლის მარიკა ჯალაღონია რომში, "საპიენცას" უნივერსიტეტში არქიტექტურისა და ურბანული რეგენერაციის სამაგისტრო პროგრამაზე სწავლობს. მან საბაკალავრო
დილის ჩართვა
ოდაბადეშ კინოხონი
დადიანების სასახლეთა საგანძური
მთავარი საინფორმაციო გამოშვება
ჩვენი თვითმმართველობა
არქივი
ამინდი
ზუგდიდი 16 °C
img
სოხუმი 16 °C
img
ფოთი 17 °C
img
მესტია 6 °C
img
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.