ჩხოროწყუში მოქალაქეებმა კიდევ ერთი პროევროპული აქცია 3 თებერვალს გამართეს. ისინი უერთდებიან საქართველოს მოსახლეობის ნაწილის მოთხოვნას, გათავისუფლდნენ აქციის დროს დაკავებული ადამიანები და დაინიშნოს ხელახალი არჩევნები.

ზუგდიდის რაიონულ სასამართლოში პარტია "დროას" წარმომადგენლისა და სამოქალაქო აქტივისტის მარიამ სიჭინავას მორიგი პროცესი გაიმართა. მოსამართლემ ირაკლი აბშილავამ ის სამართალდამრღვევად ცნო და ადმინისტრაციულ სახდელად 2000 ლარი დააკისრა.

ამჯერად, მას ბრალდების მხარე, რამდენიმე დღის წინ, ზუგდიდში მიმდინარე აქციაზე ლაზერის გამოყენებას ედავებოდა, რაც, ადმინისტრაციულ სამართალდარღვევათა კოდექსის 174-ე მუხლის მე-5 ნაწილის, ანუ შეკრების ან მანიფესტაციის ორგანიზებისა და ჩატარების წესის დარღვევას გულისხმობს.

სიჭინავა რადიო „ათინათთან“ ამბობს, რომ საქმის განხილვას ვერ დაესწრო, რადგან პროცესის დაწყვებისთანავე, ის მოსამართლემ დარბაზიდან საპროტესტო შეძახილის გამო გააძევა.

„მოსამართლეს ჯერ კიდევ სხდომა არ ჰქონდა გახსნილი, როცა სასამართლო დარბაზში დავიძახე - უსამართლო სასამართლო, ხალხის ძალის გეშინოდეს. ირაკლი აბშილავამ, როდესაც სხდომა გახსნილად გამოაცხადა, მანდატურების გამოყენებით გამაძევა სხდომიდან. არ ვიცი მერამდენე ჯარიმაა, არ ვიხდი და არ ვითვლი მათ“, - განმარტავს აქტივისტი.

ცნობისთვის, ზუგდიდში, პროევროპულ აქციებზე ე.წ ბალაკლავას ტარებისთვის, სიჭინავა არაერთხელ დააჯარიმეს. ამასთან, ის ორჯერ დააკავეს. მას გამოძიება, ორივე შემთხვევაში, შეკრების ან მანიფესტაციის ორგანიზებისა და ჩატარების წესის დარღვევას ედავებოდა. სასამართლომ მას ადმინისტრაციულ პასუხისმგებლობად 5000-5000 ლარი დააკისრა.

აფხაზეთის დე ფაქტო რესპუბლიკის ახალი რუსი კურატორის, სერგეი კირიენკოს თქმით, მნიშვნელოვანია, რომ სოხუმის აეროპორტი მიმდინარე წლის 1 მაისამდე ამოქმედდეს, ხოლო სატესტო რეისი კი თებერვალში შესრულდეს.

გარემოს ეროვნული სააგენტოს ინფორმაციით, უახლოეს დღეებში (4-6 თებერვალი) დასავლეთ საქართველოს დაბლობ და სანაპირო რაიონებში მოსალოდნელია ღრუბლიანი და ნალექიანი ამინდი.