„პირველ რიგში სწორედ კომისიის ინტერესი უნდა იყოს, რომ მთელი პროცესი წარიმართოს ღიად და გამჭვირვალედ, რა დროსაც არასამთავრობო ორგანიზაციათა მიერ გარკვეული ტიპის მონიტორინგის განხორციელება ძალზედ მნიშვნელოვანია“, - ამის შესახებ რადიო „ათინათს“ "საერთაშორისო გამჭვირვალობა-საქართველოს" ზუგდიდის რეგიონული წარმომადგენლობის კოორდინატორმა არჩილ თოდუამ განუცხადა. მისივე თქმით, მთავრობის 417-ე დადგენილებაში არასამთავრობო ორგანიზაციების გასაუბრებაზე დაშვების შესახებ არანაირი აკრძალვა არ არის დათქმული.

„შესაბამისად კომისიას რა თქმა უნდა შეეძლო მოეცა ჩვენთვის გაუსაუბრების პროცესის დაკვირვების უფლება. ჩვენი ორგანიზაცია აქტიურად აკვირდებოდა 3 წლის წინ გამართულ საჯარო მოხელეთა შესარჩევ კონკურს და იმ სამართლებრივ აქტებშიც, რომელიც კონკურსის მიმდინარეობას განსაზღვარვს არ არის რაიმე სახის დათქმა არასამთავრობო ორგანიზაციისათვის დაკვირვების უფლების მინიჭების ან აკრძალვის შესახებ. შესაბამისად თუკი მაშინ შესაძლებელი იყო ჩვენი ჩართულობა ამ პროცესში, გაუგებარია დღეს რატომ არ არის შესაძლებელი“, - აღნიშნა თოდუამ.

გამჭვირვალობისთვის ასევე გაუგებარია, რატომ არიან კომისიის წევრებად ის პროფესიული საჯარო მოხელეები, რომელთა შეფასებაც სხვა მოხელეთა მსგავსად უნდა მოხდეს.

ზუგდიდის გამგეობაში ამ წუთებში საჯარო მოხელეთა გასაუბრება მიმდინარეობს. გამგეობის პრესსამსახურის ინფორმაციით, გასაუბრება გამგეობისა და საკრებულოს თანამშრომლებს ეხება და ის სამი დღის განმავლობაში გაგრძელდება.

ამავე თემაზე:

ზუგდიდში საჯარო მოხელეთა გასაუბრებაზე „გამჭვირვალობა“ არ დაუშვეს (ვიდეო)