იძულებით გადაადგილებულ ქალთა ასოციაცია „თანხმობამ“ ზუგდიდში სხვადასხვა პარტიის მერობისა და მაჟორიტარი დეპუტატობის კანდიდატებთან შეხვედრა გამართა. ორგანიზაციის ხელმძღვანელის იულია ხარაშვილის თქმით, შეხვედრის მიზანია ამომრჩევლებმა კანდიდატებისგან მოისმინონ, თუ რა პროგრამები აქვთ მათ დევნილი ქალებისა და გოგონების გაძლიერებისთვის.

„წლებია ვმუშაობთ საქართველოს მთელს ტერიტორიაზე, მათ შორის ზუგდიდში. ჩვენი პროექტის ერთ-ერთი ამოცანაა გავაძლიეროთ სამოქალაქო საზოგადოება და შევისწავლოთ დევნილების პრობლემები. „გვაინტერესებს დღევანდელ კანდიდატებს სხავადსხვა პარტიებიდან რა პროგრამები აქვთ და ითვალისწინებს, თუ არა მათი პროგრამები, დევნილების და კონფლიქტით დაზარალებული ადამიანების მათ შორის ქალების და გოგონების პრობლემებს“, - აღნიშნა მან.

კანდიდატებმა არსებული პრობელმების მოგვარების გზებზე ზოგადად ისაუბრეს და აღნიშნეს, რომ მათ საარჩევნო პროგრამებში, როგორც ადგილობრივი, ასევე დევნილი მოსახლეობის პრობლემების გადაჭრის გზებია ასახული.

„დემოკრატიული მოძრაობა - თავისუფალი საქართველოს“ მაჟორიტარი დეპუტატობის კანდიდატის გურგენ სართანიას თქმით, იგი ადგილობრივი ბიუჯეტიდან ეკონომიკური განვითარებისა და მცირე ბიზნესის წამოსაწყებად ადგილობრივ ბიუჯეტში 500 ათასი ლარის გათვალისწინებას გეგმავს.

„შენების მოძრაობის“ მერობის კანდიდატის მაია ღურწკაის განმარტებით, მისი მოძრაობა შეეცდება, რომ დევნილებს ღირსეულ საცხოვრებელი და სამუშაო პირობებს შეუქმნას.

„ქართული ოცნების“ მაჟორიტარი დეპუტატობის კანდიდატის ირუზა კაკავა ამბობს, რომ მას სხვადასხვა არასამთავრობო ორაგნიზაციების დახმარებითა და საკუთარი ძალისხმევით ადგილობრივების, დევნილი ქალების და ბავშვების დასახმარებლად არაერთი პოექტი განუხორციელებია. ის მომავალშიც ამ მიმართულებით გეგმავს მუშაობის გაგრძელებას. 

„პატრიოტთა ალიანსის“ ზუგდიდის მერობის კანდიდატი გოგიტა ბიგვავა მიიჩნევს, რომ დევნილების პრობლემა  სახელმწიფოს პრობლემაა და ის მუნიციპალიტეტის დონეზე ვერ გადაწყდება, თუმცა ამბობს რომ, მას მჭიდრო კომუნიკაცია ექნება დევნილთა სამინისტროსთან.

„ევროპული საქართველოს“ წარმომადგენლებმა, კი დევნილთა განსახლების პრობლემაზე გაამახვილეს ყურადღება და აღნიშნეს, რომ მათ დღემდე უკიდურესად რთულ პირობეში უწევთ ცხოვრება.

რაც შეეხება დამოუკიდებელი კანდიდატის დომენტი სიჭინავას იურისტის კესო ჩხიკვაძის განცხადებით, სახელმწიფოს ღირსების საკითხია, ის რომ დევნილები დღეს რთულ პირობებში იმყოფებიან. მისი თქმით, მთავრობის მთავარი მიზანი არა ერთჯერადი დახმარება, არამედ დევნილების ფსიქოლოგიური დახმარება და განვითარება უნდა იყოს.

შეხვედრის მთავარი თემის - ქალებისა და გოგონების გაძლიერბის შეასხებ კონკრეტულ გეგმებზე არცერთი პარტიის კანდიდატს არ უსაუბრია.

ღონისძიება პროექტის „ერთად ჩვენი უფლებებისთვის“ ფარგლებში გაიმართა, რომელსაც ასოციაცი „თანხმობა“ გერმანული ორგანიზაცია „პური მსოფლიოსთვის“ მხარდაჭერით ახორციელებს.